تاثیر،۱۴ دسمبر۲۰۲۳:- ایس -ایم- حسن
رانچی (جھارکھنڈ)، 14 دسمبر:کانگریس کے راجیہ سبھا رکن دھیرج ساہو کے رانچی کے ریڈیم روڈ واقع گھر پر آئی ٹی (انکم ٹیکس ڈپارٹمنٹ) کے چھاپے نویں دن بھی جاری ہیں۔ آئی ٹی ٹیم ریڈیم روڈ پر واقع رہائش گاہ کی زمین کھودنے کی تیاری کر رہی ہے۔جمعرات کو بھی رانچی کی رہائش گاہ پر آئی ٹی ٹیم کی سرگرمی بڑھ گئی ہے۔ اہلکار مسلسل رہائشی کمپلیکس کا بہت قریب سے جائزہ لے رہے ہیں۔ اس سے پہلے بدھ کو آئی ٹی ٹیم نے جیو سرویلنس سسٹم مشین کے ذریعے لوہردگا، رانچی اور اڈیشہ میں گھر کی زمین کی تلاشی لی تھی۔قابل ذکر ہے کہ 6 دسمبر کو انکم ٹیکس کی ٹیم نے دھیرج ساہو کے کئی مقامات پر چھاپے مارے تھے اور رقم سے بھری 30 الماریوں کو برآمد کیا تھا۔ اس دن سے نوٹوں کی گنتی جاری ہے۔ معلومات کے مطابق اب تک 500 کروڑ روپے مل چکے ہیں۔ نوٹوں کے علاوہ 17 کلو زیورات بھی ملے۔