تاثیر،۱۳ دسمبر۲۰۲۳:- ایس -ایم- حسن
جموں، 13 دسمبر: جموں و کشمیر کے لیفٹیننٹ گورنر منوج سنہا نے سال 2001 میں آج ہی کے دِن پارلیمنٹ پر دہشت گردانہ حملے میں شہید ہونے والے جوانوں کو خراج عقیدت پیش کیا۔ آج سے 22 سال قبل پانچ بھاری ہتھیاروں سے لیس دہشت گردوں نے پارلیمنٹ کمپلیکس پر دھاوا بولا تھا جس میں نو افراد شہید ہوئے تھے۔ تاہم دہشت گردوں کو مرکزی عمارت میں داخل ہونے سے پہلے ہی گولی مار دی گئی۔
اس حملے میں دہلی پولیس کے پانچ اہلکار، سینٹرل ریزرو پولیس فورس (سی آر پی ایف) کا ایک اہلکار، دو پارلیمنٹ واچ اور وارڈ کا عملہ اور ایک باغبان اپنی جان سے ہاتھ دھو بیٹھے تھے۔ سنہا نے ایکس پر کہا میں شہیدوں کو خراج عقیدت پیش کرتا ہوں جنہوں نے 2001 کے پارلیمنٹ حملے کے دوران اپنی جانیں قربان کیں۔ انہوں نے کہا کہ قوم ان کی مثالی جرات، بہادری اور عظیم قربانی کی ہمیشہ مقروض رہے گی۔