تاثیر،۲۴ دسمبر۲۰۲۳:- ایس -ایم- حسن
ہاردک پانڈیا کے ممبئی انڈینز جانے کے حوالے نہرا کا بڑا بیان
نئی دہلی ،24دسمبر :آشیش نہرا نے ہاردک پانڈیا کے گجرات ٹائٹنز چھوڑ کر ممبئی انڈینز ٹیم میں شامل ہونے پر بڑا ردعمل دیا ہے۔ انہوں نے کہا کہ یہ حیرت کی بات نہیں ہونی چاہیے کہ ہاردک پانڈیا نے گجرات چھوڑ کر ممبئی ٹیم میں شمولیت اختیار کی ہے، کیونکہ وہ ممبئی انڈینز کے لیے کئی سیزن کھیل چکے ہیں۔ آشیش نہرا کے مطابق گجرات ٹائٹنز کبھی بھی ایسے کھلاڑی کو نہیں روکتا جو جانا چاہتا ہے۔
ہاردک پانڈیا نے دو سال تک گجرات ٹائٹنز کے لیے کھیلا اور اپنی کپتانی میں ٹیم ٹائٹل بھی جیتا۔ تاہم، آئی پی ایل 2024 سے پہلے، انہوں نے گجرات کی ٹیم چھوڑ کر ممبئی انڈینز میں شامل ہونے کا فیصلہ کیا۔ ممبئی انڈینز نے ہاردک پانڈیا کو آئی پی ایل 2024 کے لیے ٹیم کا کپتان مقرر کیا ہے۔ روہت شرما کو ہٹا کر ہاردک پانڈیا کو ٹیم کی کمان سونپی گئی ہے۔
ہاردک پانڈیا کے جانے کے بعد گجرات ٹائٹنز کی ٹیم میں ایک بڑا خلا ہے اور آشیش نہرا کے مطابق یہ جگہ آسانی سے پْر نہیں ہو سکتی۔ تاہم انہوں نے یہ بھی کہا کہ ہاردک ممبئی کی ٹیم میں شامل ہونا چاہتے تھے اور انہیں جانے کی اجازت دی گئی۔ نہرا نے جیو سنیما پر بات چیت کے دوران کہاکہہاردک پانڈیا ایسی ٹیم میں شامل نہیں ہوئے، جو بہت حیران کن ہے۔ وہ کئی سالوں سے اس ٹیم کے لیے کھیل رہے ہیں۔ اس نے اس ٹیم میں جانے کی خواہش ظاہر کی تھی۔ ہماری انتظامیہ کی فطرت ہے کہ اگر کوئی کھلاڑی جانا چاہے تو اسے جانے دیں۔ اس کھلاڑی کو خوش ہونا چاہیے اور اسی لیے ہاردک پانڈیا کو روکنے کی کوئی کوشش نہیں کی گئی۔ ہاردک کی جگہ لینا آسان نہیں ہے لیکن ہم نے پوری کوشش کی۔ ہم نے عظمت اللہ عمرزئی اور شاہ رخ خان جیسے کھلاڑی خریدے ہیں۔