تاثیر،۲۷ جنوری۲۰۲۴:- ایس -ایم- حسن
پٹنہ، 27 جنوری: بہار میں ایک بار پھر نتیش کمار نے پلٹی مارنے کے تیاری کر لی ہے۔ ذرائع کے مطابق لوک سبھا انتخابات کے ساتھ اسمبلی انتخابات کرانے کے امکانات ہیں، حالانکہ بی جے پی اس کے لیے تیار نہیں ہے۔ بی جے پی کا ماننا ہے کہ اگر دونوں انتخابات ایک ساتھ ہوتی ہے تو نتیش کمار کی اینٹی انکبنسی کا نقصان اٹھانا پڑ سکتا ہے۔ ایسے میں آج شام بی جے پی کی میٹنگ ہے لیکن اس سے پہلے بی جے پی کور کمیٹی کی میٹنگ ہوئی۔
ایک نجی ہوٹل میں جاری بی جے پی کور کمیٹی کی میٹنگ ختم ہوگئی۔ اس میٹنگ میں بی جے پی کے بڑے رہنما موجود تھے۔ ریاستی صدر سمراٹ چودھری نے اجلاس کی صدارت کی۔ بی جے پی ایم ایل سی بھی بی جے پی کور کمیٹی میٹنگ میں شرکت کے لیے پہنچے۔ بی جے پی کے قانون ساز کونسلر دلیپ جیسوال نے صاف کہہ دیا ہے کہ سیاست میں کسی کے لیے کوئی دروازہ بند نہیں ہوتا ہے۔
اشونی چوبے، نتیا نند رائے، گری راج سنگھ نے اس میٹنگ میں شرکت کی۔ اس کے ساتھ ہی کور کمیٹی کی میٹنگ میں سنجے جیسوال، وجے سنہا، ہری سہنی، سشیل مودی، بہار انچارج ونود تاوڑے سمیت کئی بڑے لیڈر موجود تھے۔
بہار کی سیاسی صورتحال پر اسمبلی میں قائد حزب اختلاف وجے کمار سنہا نے کہا کہ ہماری قیادت اجتماعی اور قابل قیادت ہے اور صرف قومی مفاد میں فیصلے کرتی ہے اور لوگ ان کے فیصلوں کا خیر مقدم کرتے ہیں۔ بی جے پی کا ہر کارکن ایک سپاہی، کمانڈر کی طرح ہے۔
اس کے ساتھ ہی بی جے پی نے پہلے ہی اپنے ایم ایل اے کو پٹنہ میں رہنے کی ہدایت دی ہے اور اب سے کچھ دیر میں لیجسلیچر پارٹی کی میٹنگ ہونی ہے۔ اس ملاقات میں مزید حکمت عملی پر غور کیا جائے گا۔ ذرائع کے حوالے سے یہ بھی بتایا گیا ہے کہ بی جے پی اپنے ایم ایل اے کو حمایتی خط پر دستخط کرنے اور اسے آج ہی نتیش کمار کو سونپے گی۔