تاثیر،۲۵ جنوری۲۰۲۴:- ایس -ایم- حسن
امپھال، 25 جنوری : منی پور پولیس نے ریاست کے مختلف اضلاع کے حساس اوردشوار گزار علاقوں میں گہرے چھاپے اور تلاشی کی کارروائیاں کیں۔ آپریشن میں 228 افراد کو تعزیرات ہند کی مختلف دفعات کی خلاف ورزی کے الزام میں حراست میں لیا گیا۔
اس دوران سیکورٹی فورسز نے چورا چاند پور ضلع کے ڈمپی رینج میں دو بنکروں کو تباہ کر دیا۔ پولیس نے بتایا کہ ضروری اشیا کے ساتھ قومی شاہراہ نمبر 37 پر 228 گاڑیوں اور قومی شاہراہ نمبر 2 پر 173 گاڑیوں کی نقل و حرکت کو یقینی بنایا گیا ہے۔
گاڑیوں کی آزادانہ اور محفوظ نقل و حرکت کو یقینی بنانے کے لیے تمام حساس مقامات پر سخت حفاظتی اقدامات کیے گئے ہیں۔ حساس علاقوں میں سیکورٹی فورسز کو بڑے پیمانے پر تعینات کیا گیا ہے۔ پولیس نے کہا کہ منی پور کے مختلف اضلاع میں، پہاڑیوں اور وادی دونوں میں 136 چوکیاں اور چیک پوسٹیں قائم کی گئی ہیں۔