تاثیر،۷ جنوری۲۰۲۴:- ایس -ایم- حسن
نئی دہلی ،07جنوری :آسٹریلوی ٹیم کے مایہ ناز اوپننگ بلے باز ڈیوڈ وارنر نے ٹیسٹ کرکٹ سے ریٹائرمنٹ لے لی۔ پاکستان کے خلاف سڈنی ٹیسٹ میچ ان کے کیریئر کا آخری ٹیسٹ میچ تھا۔ اب انہوں نے اپنے شاندار ٹیسٹ کیریئر کو الوداع کہہ دیا ہے۔ اس دوران ڈیوڈ وارنر سے ایک مزاحیہ سوال پوچھا گیا کہ کیا وہ ریٹائرمنٹ کے بعد ٹیسٹ کوچنگ سنبھالیں گے، جس پر وارنر نے کہا کہ پہلے انہیں اس بارے میں اپنی اہلیہ سے پوچھنا ہوگا۔
ڈیوڈ وارنر نے پاکستان کے خلاف ٹیسٹ سیریز سے پہلے ہی بتا دیا تھا کہ وہ سڈنی میں کھیلے جانے والے میچ کے بعد ٹیسٹ فارمیٹ کو الوداع کہہ دیں گے۔ تاہم، سیریز کے وسط میں، انہوں نے ٹیسٹ کے ساتھ ساتھ ون ڈے سے بھی ریٹائرمنٹ کا اعلان کر دیا۔ بائیں ہاتھ کے بلے باز نے ٹیسٹ کی اپنی آخری اننگز میں شاندار نصف سنچری اسکور کی اور اپنے کیریئر کا بہترین انداز میں خاتمہ کیا۔
صحافیوں سے بات کرتے ہوئے ڈیوڈ وارنر نے اپنی کوچنگ کے عزائم کے بارے میں جواب دیا۔ انہوں نے کہا کہ ہاں، میں یقینی طور پر کوچ بننے کی خواہش رکھتا ہوں۔ تاہم اس کے لیے مجھے سب سے پہلے اپنی بیوی سے پوچھنا پڑے گا کہ کیا وہ مجھے مزید کچھ دن باہر رہنے کی اجازت دے گی؟
بتا دیں کہ ڈیوڈ وارنر نے اپنے کیریئر میں 112 ٹیسٹ میچوں میں 8786 رنز بنائے جس میں 26 سنچریاں اور 37 نصف سنچریاں شامل ہیں۔ اپنے کیریئر کے دوران وہ ورلڈ ٹیسٹ چمپئن شپ بھی جیتنے میں کامیاب رہے۔ 2009 میں اپنے بین الاقوامی کیریئر کا آغاز کرنے والے ڈیوڈ وارنر کو ٹیسٹ اور ون ڈے کے عظیم اوپنرز میں سے ایک سمجھا جاتا ہے۔ انہوں نے اپنے دھماکہ خیز انداز سے گیند بازوں کو خوب جھنجھوڑ دیا۔ اگرچہ وارنر ٹیسٹ اور ون ڈے سے ریٹائر ہو چکے ہیں لیکن وہ پھر بھی T20 کرکٹ کھیلنا جاری رکھیں گے۔