تاثیر،۱۶فروری ۲۰۲۴:- ایس -ایم- حسن
نئی دہلی ،18فروری :ہندوستان کی بیٹیوں نے تاریخ رقم کی ہے۔ ہندوستانی خواتین ٹیم نے بیڈمنٹن ایشیا ٹیم چمپئن شپ کا خطاب جیت لیا ہے۔ نوجوان انمول کھر ب نے ایک بار پھر شاندار کارکردگی کا مظاہرہ کرتے ہوئے ٹیم انڈیا کی جیت میں اہم کردار ادا کیا۔ ہندوستان نے ایک سنسنی خیز فائنل میں تھائی لینڈ کو 3-2 سے شکست دے کر اپنا پہلا طلائی تمغہ جیتا۔ پی وی سندھو کی قیادت میں ہندوستانی خواتین کی ٹیم کے نوجوان اور متحرک گروپ نے تھائی لینڈ کی امیدوں پر پانی پھیر دیا اور دو بار کانسی کا تمغہ جیتنے والی تھائی لینڈ کے خلاف کامیابی حاصل کی۔
مقابلے کی زیادہ تر ٹیموں کی طرح تھائی لینڈ پوری طاقت سے نہیں کھیل رہی تھی۔ وہ اپنے دو سرفہرست سنگلز کھلاڑیوں کے بغیر اترے تھے – عالمی نمبر 13رتنا چوک انتا نون اور عالمی نمبر 16 پورن پاوی چوچو ونگ کے بغیر تھے۔ دو مرتبہ کی اولمپک تمغہ جیتنے والی پی وی سندھو، جو چار ماہ بعد ایکشن میں واپس آئی ہیں، نے پہلے میچ میں عالمی نمبر 17 سوپانیڈا کیتھونگ کو 21-12، 21-12 سے شکست دی۔ انہوں نے پہلا سنگلز میچ جیت کر ہندوستان کو 1-0 کی برتری دلائی۔
عالمی نمبر 23 ترشا جولی اور گایتری گوپی چند نے پھر اپنی شاندار کارکردگی کو جاری رکھا اور عالمی نمبر 10 کی جوڑی کے خلاف شاندار کارکردگی پیش کی۔ جونگکولفن کٹیتھاراکول اور رویندا پرا جونگجائی کو ترشا گایتری جوڑی نے 21-16، 18-21، 21-16 سے شکست دے کر ہندوستان کو ڈرائیور سیٹ پر کھڑا کیا۔ اشمیتا چلیہا سے کافی توقعات وابستہ تھیں، جو اپنا دوسرا سنگلز میچ عالمی نمبر 18 کھلاڑی بوسانان اونگبامرنگفن کے خلاف کھیل رہی تھیں۔ ہفتہ کو اشمیتا نے سابق عالمی چمپئن جاپان کی نوجومی اوکوہارا کے خلاف شاندار فتح حاصل کی تھی۔
اشمیتا نے 2022 میں سنگاپور اوپن کے دوران بوسانن کو شکست دی تھی۔ وہ دوسرے گیم میں 14-14 تک میچ میں برقرار رہیں، لیکن اس کے بعد غلطیاں اشمیتا کو مہنگا پڑا اور وہ تجربہ کار تھائی کھلاڑی سے 11-21 ۔14-21 سے ہار گئیں۔ نوجوان شروتی مشرا اور سینئر قومی چمپئن پریا کونجینگبم کے لیے بینیاپا ایمسارڈ اور نوناٹاکرن امسارڈ کی عالمی نمبر 13 جوڑی کو شکست دینا ایک مشکل کام تھا اور دنیا کی 107 نمبر کی ہندوستانی جوڑی نے، جیسا کہ توقع کی گئی تھی، 29 منٹ میں 11 ۔ 21، 9-21 سے ہار گئیں۔