تاثیر،۲۱فروری ۲۰۲۴:- ایس -ایم- حسن
جموں ،21 فروری :جموں و کشمیر میں گزشتہ چار روز سے بارش اور برفباری کا سلسلہ جاری ہے۔بدھ کی صبح موسم میں بہتری کے ساتھ ہی تیز دھوپ نکل آئی لیکن کچھ دیر بعد موسم نے پھر کروٹ بدل لی ہے۔پہاڑی علاقوں میں برفباری اور میدانی علاقوں میں بارش کا سلسلہ دوبارہ شروع ہو گیا ہے۔ وہیں سری نگر جموں قومی شاہراہ تیسرے دن بھی گاڑیوں کی آمدرفت کے لئے بند ہے۔ حکام نے بتایا کہ بدھ کو سری نگر ہوائی اڈے پر پروازیں معمول کے مطابق چل رہی ہیں۔تاہم منگل کو خراب موسم کی وجہ سے کئی پروازیں منسوخ کر دی گئیں۔
جموں سری نگر قومی شاہراہ اور سری نگر لیہہ شاہراہ بدھ کو برف باری اور بارش کی وجہ سے گاڑیوں کی آمدورفت کے لیے بند رہی۔ ٹریفک حکام نے بتایا کہ جموں سری نگر قومی شاہراہ گزشتہ 24 گھنٹوں کے دوران بارش کی وجہ سے مٹی کے تودے، لینڈ سلائیڈنگ اور کئی مقامات پر پتھر گرنے کی وجہ سے بند ہے۔
ٹریفک پولیس کے ایک ترجمان نے کہا کہ لوگوں کو مشورہ دیا جاتا ہے کہ وہ قومی شاہراہ پر سفر سے گریز کریں۔ انہوں نے بتایا کہ کپواڑہ ضلع میں کیرن اور مچل سڑکوں کو جوڑنے والی سڑکیں، اننت ناگ سنتھن ٹاپ، اور مغل روڈ منگل کو برف باری کی وجہ سے گاڑیوں کی آمدورفت کے لیے بند کر دی گئی تھیں۔
ریلوے کے ایک اہلکار نے بتایا کہ پٹریوں پر برف جمع ہونے کی وجہ سے بدھ کو کئی ٹرین خدمات معطل کر دی گئیں۔ محکمہ موسمیات نے بتایا کہ 26 فروری تک موسم میں کوئی خاص تبدیلی نہیں ہے۔لیکن 27 سے 29 فروری کو بیشتر مقامات پر ہلکی سے درمیانی بارش اور برف باری کا امکان ہے۔ محکمہ موسمیات نے ایک ایڈوائزری بھی جاری کی ہے جس میں سیاحوں اور لوگوں کو خبردار کیا گیا ہے کہ وہ گزشتہ دو دنوں کے دوران چند درمیانی اور اونچی جگہوں پر ہونے والی شدید برف باری کے بعد سفر کرنے کے لیے ٹریفک پولیس کی ایڈوائزری پر عمل کریں۔ پہاڑی علاقوں میں رہنے والے عام لوگوں کو یہ بھی مشورہ دیا ہے کہ وہ برفانی تودے کے شکار علاقوں میں نہ جائیں۔ کیونکہ کچھ جگہوں پر تودے گرنے، مٹی کے تودے گرنے کے امکانات ہوتے ہیں۔