تاثیر،۲فروری ۲۰۲۴:- ایس -ایم- حسن
بالی ووڈ کی سب سے زیادہ معاوضہ لینے والی اداکارہ دیپیکاپادوکون گزشتہ کچھ دنوں سے خبروں میں ہیں۔ ابھی چند روز قبل ریلیز ہونے والی ان کی فلم ‘ فائٹر’ ہٹ ہوگئی ہے۔ اس فلم میں دیپیکا پادوکون مرکزی کردار میں ہیں۔ دیپیکاپادوکون وزیر اعظم نریندر مودی کا ‘پرکشا پہ چرچہ’ پروگرام دیکھ کر کافی متاثر ہوئی ہیں۔ دیپیکا نے ایک خصوصی پوسٹ شیئر کرکے مودی کی تعریف کی ہے۔ انہوں نے ان کا شکریہ بھی ادا کیا ہے۔دیپیکا نے انسٹاگرام پر کہانی شیئر کی ہے۔ اس میں انہوں نے لکھا، ‘پیارے وزیر اعظم نریندر مودی، آپ کا بہت بہت شکریہ۔ امتحان کے دباؤ سے بچنے کے لیے جس طرح سے آپ اسکول کے بچوں، ان کے والدین اور اساتذہ کے ساتھ بات چیت کرتے ہیں وہ قابل ستائش ہے۔” اس کے ساتھ ہی دیپیکا نے وزیر اعظم کے ‘ پرکشا پہ چرچہ’ پروگرام کا لنک بھی شیئر کیا۔ دیپیکا کی اس پوسٹ کو نیٹیزنز نے کافی پسند کیا ہے۔درحقیقت، وزیر اعظم نریندر مودی نے حال ہی میں دارالحکومت دہلی میں ‘پرکشا پہ چرچہ’ پروگرام میں لاکھوں طلبہ کو امتحانی دباؤ کو کم کرنے کے لیے بہت سے مشورے دیے۔ فلم فائٹر کی بات کریں تو دیپیکا اس میں اسکواڈرن لیڈر مینل راٹھور کا کردار ادا کر رہی ہیں۔ فلم ’فائٹر‘ پلوامہ حملے پر مبنی ہے۔ فلم میں دکھایا گیا ہے کہ کس طرح بھارتی فوج دہشت گرد حملے کے بعد پاکستان پر فضائی حملے کرتی ہے۔ دیپیکا نے اس فلم میں اپنی شاندار اداکاری سے سب کو متاثر کیا ہے۔