تاثیر،۲۱مارچ ۲۰۲۴:- ایس -ایم- حسن
نئی دہلی، 21مارچ :دہلی کے وزیر اعلی اروند کیجریوال نے دہلی ہائی کورٹ میں درخواست دائر کی ہے۔ اپنی درخواست میں اروند کیجریوال نے مطالبہ کیا ہے کہ عدالت انفورسمنٹ ڈائریکٹوریٹ (ای ڈی) کو کوئی قانونی کارروائی نہ کرنے کی ہدایت کرے۔ اروند کیجریوال اور ان کی پارٹی مسلسل دعویٰ کر رہی ہے کہ دہلی کے وزیر اعلیٰ کو گرفتار کیا جا سکتا ہے۔ای ڈی نے اروند کیجریوال کو آج پوچھ گچھ کے لیے بلایاتھا۔ پوچھ گچھ سے پہلے ہی انہوں نے دہلی ہائی کورٹ میں درخواست دائر کی اور گرفتاری کا خدشہ ظاہر کیا۔ اروند کیجریوال نے اپنی درخواست میں کہا کہ اگر انہیں عدالت سے یہ یقین دہانی کرائی جاتی ہے کہ انہیں گرفتار نہیں کیا جائے گا، تو وہ پوچھ گچھ کے لیے ای ڈی کے سامنے حاضر ہونے کے لیے تیار ہیں۔اروند کیجریوال کو اب تک کل 9 سمن بھیجے گئے ہیں۔ انہیں پہلا سمن 2 نومبر 2023 کو بھیجا گیا تھا لیکن وہ وہاں پیش نہیں ہوئے۔ اس کے بعد انہیں 21 نومبر، 3 جنوری، 18 جنوری، 2 فروری، 19 فروری، 26 فروری، 4 مارچ اور 17 مارچ کو سمن بھیجے گئے۔تاہم سی ایم اروند کیجریوال کسی بھی سمن پر حاضر نہیں ہوئے۔ انہوں نے الزام لگایا کہ یہ سمن سیاسی طور پر محرک ہے۔ جب اروند کیجریوال سمن پر حاضر نہیں ہوئے تو ای ڈی عدالت پہنچ گئی۔ گزشتہ ہفتے ہی اروند کیجریوال کو عدالت سے ضمانت ملی تھی۔ ہفتہ کو وہ ویڈیو کانفرنسنگ کے ذریعے عدالت میں پیش ہوئے۔سی بی آئی دہلی شراب گھوٹالے کی تحقیقات کر رہی ہے۔ ای ڈی اس سے متعلق منی لانڈرنگ کیس کی جانچ کر رہی ہے۔ دہلی کے سابق نائب وزیر اعلی منیش سسودیا اس معاملے میں پہلے ہی جیل میں ہیں۔ اس کے علاوہ عام آدمی پارٹی کے راجیہ سبھا ایم پی سنجے سنگھ بھی جیل میں ہیں۔ دہلی شراب گھوٹالہ معاملے میں ای ڈی نے حال ہی میں تلنگانہ کے سابق وزیر اعلیٰ کے۔ چندر شیکھر راؤ کی بیٹی کے کویتا کو بھی گرفتار کر لیا گیا ہے۔