تاثیر،۱۹مارچ ۲۰۲۴:- ایس -ایم- حسن
کولکاتا، 19 مارچ : لوک سبھا انتخابات شروع ہو چکے ہیں۔ پورے ملک کے ساتھ مغربی بنگال میں بھی سیاسی درجہ حرارت بلند ہے۔ ریاست کی کئی سیٹیں ہائی پروفائل ہیں، جن میں مرشد آباد کی بہرام پور سیٹ بھی شامل ہے۔ یہاں سے موجودہ رکن پارلیمنٹ ادھیر رنجن چودھری ہیں، جو لوک سبھا میں کانگریس کے لیڈر ہیں اور وہ گزشتہ پانچ بار یہاں سے رکن پارلیمنٹ رہے ہیں۔
کس پارٹی سے کون سا امیدوار؟
کانگریس نے ابھی تک امیدوار کا اعلان نہیں کیا ہے لیکن ادھیر رنجن چودھری کو ٹکٹ ملنے کا پورا امکان ہے۔ وہیں ترنمول نے سابق کرکٹر یوسف پٹھان کو ٹکٹ دے کر مقابلہ دلچسپ بنا دیا ہے۔ گجرات سے تعلق رکھنے والے پٹھان ٹیم انڈیا کے مشہور کھلاڑی رہ چکے ہیں۔ بہرام پور مسلم اکثریتی علاقہ ہے اور ترنمول یہاں پٹھان کی امیدواری کے لیے پرامید ہے۔ تاہم پٹھان کی امیدواری کو لے کر ترنمول کے اندر مخالفت کی آوازیں اٹھ رہی ہیں۔نارتھ بی جے پی نے ڈاکٹر نرمل کمار ساہا کو ٹکٹ دیا ہے۔ نرمل علاقے کی ایک مشہور سماجی کارکن اور صاف ستھری شبیہ والے رہنما ہیں۔ اگر مسلم ووٹ کانگریس اور ترنمول کے درمیان تقسیم ہوتے ہیں تو بی جے پی کو فائدہ ہوسکتا ہے۔بایاں محاذ یہاں سے امیدوار نہیں کھڑا کرے گا کیونکہ سی پی آئی (ایم) اور کانگریس کے درمیان اتحاد کے امکانات ہیں۔