تاثیر،۳۰مارچ ۲۰۲۴:- ایس -ایم- حسن
ممبئی، 30 مارچ: کانگریس کے سینئر لیڈر اور سابق مرکزی وزیر داخلہ شیوراج پاٹل کی بہو ڈاکٹر ارچنا پاٹل چاکورکر نے ہفتہ کو نائب وزیر اعلی دیویندر فڑنویس کی موجودگی میں بھارتیہ جنتا پارٹی (بی جے پی) میں شمولیت اختیار کی۔ واضح رہے کہ اس سے قبل اشوک چوہان چند ماہ قبل بی جے پی میں شامل ہوئے تھے۔ اشوک چوان کے بعد سیاسی حلقوں میں یہ بات چل رہی تھی کہ کانگریس کے کچھ اور لیڈر بی جے پی میں شامل ہوں گے۔ ان میں سابق مرکزی وزیر داخلہ شیوراج پاٹل چاکورکر کی بہو ڈاکٹر ارچنا پاٹل چاکورکر کا نام سب سے آگے تھا۔ جمعہ کو ڈاکٹر ارچنا پاٹل چاکورکر نے نائب وزیر اعلی دیویندر فڑنویس سے ملاقات کی۔ پھر ہفتہ کو ڈاکٹر ارچنا پاٹل چاکورکر نائب وزیر اعلی دیویندر فڑنویس اور بی جے پی کے ریاستی صدر چندر شیکھر باونکولے کی موجودگی میں بی جے پی میں شامل ہو گئیں۔ سابق مرکزی وزیر داخلہ شیوراج پاٹل چاکورکر کے بیٹے اور سابق ایم ایل اے بسواراج پاٹل پہلے ہی بی جے پی میں شامل ہو چکے ہیں۔
مہاراشٹر میں لوک سبھا انتخابات کے دوران کانگریس لیڈر پارٹی چھوڑتے ہوئے نظر آ رہے ہیں۔ اس سے پہلے بھی کانگریس کے کئی لیڈر دوسری پارٹیوں میں شامل ہو چکے ہیں۔ اشوک چوان، ملند دیوڑا، بابا صدیقی، بسواراج پاٹل وغیرہ نے چند ماہ قبل پارٹی چھوڑ دی تھی۔ بتایا جا رہا ہے کہ کانگریس پارٹی کے کئی رہنما فی الحال بی جے پی سے رابطے میں ہیں اور بہت جلد بی جے پی میں شامل ہو سکتے ہیں۔ لوک سبھا انتخابات سے قبل ان بڑے لیڈروں کے پارٹی چھوڑنے سے کانگریس کو بڑا دھچکا لگا ہے۔