تاثیر،۱۵مارچ ۲۰۲۴:- ایس -ایم- حسن
پلامو، 14 مارچ : نیشنل ہائی وے 98 ڈالٹن گنج-اورنگ آباد مین روڈ فور لین پر بدھ کی رات ایک کار اور بائک کے درمیان زبردست تصادم ہوا۔ حادثے میں خاتون سمیت دو افراد جاں بحق ہوگئے۔ حادثے میں موٹر سائیکل میں آگ لگ گئی۔ آگ کے شعلے گاڑی کو بھی اپنی زد میں لینے والے تھے۔ اس سے پہلے مقامی لوگوں اور دوسری گاڑیوں میں سفر کرنے والے لوگوں نے آگ بجھائی اور زخمیوں کو علاج کے لیے بھیج دیا۔ دونوں گاڑیوں میں سوار چار افراد زخمی ہوگئے۔ تمام کو علاج کے لیے ایم آر ایم سی ایچ بھیجا گیا ہے۔ مرنے والوں میں کار میں سوار خاتون کی شناخت گرڈیہ کی رہنے والی پربھا کماری شرما کے طور پر کی گئی ہے، جب کہ حادثے میں مرنے والے بائک سوارنوجوان کی شناخت چھتر پور تھانہ علاقے کے مندیا کے رہنے والے کلندرا اوراوں کے طور پر ہوئی ہے۔
بتایا جاتا ہے کہ کار اورنگ آباد کی طرف سے ڈالٹن گنج کی طرف جارہی تھی، جب کہ بائک سوار کرماچرائی روڈ کی جانب سے آکر بیریاڈیہ موڈ نیشنل ہائی وے پر چڑھے تھے۔ موٹر سائیکل پر چار نوجوان سوار تھے، جب کہ کار میں سوار افراد کی تعداد پانچ تھی۔ اچانک بائک کے سامنے آجانے کی وجہ سے کار سے اس کی زوردار ٹکر ہو گئی۔ تصادم اس قدر زوردار تھا کہ تصادم کے بعد موٹر سائیکل اور کار فور لین روڈ کی رانگ سائیڈ پر جا کر الٹ گئے۔ کار تین سے چار بار الٹ پلٹ گئی جبکہ موٹر سائیکل کو آگ لگ گئی۔ اس دوران آس پاس کے لوگوں اور گاڑیوں میں سوار افراد نے آگ پر قابو پایا۔ساتھ ہی کار میں سوار لوگوں کو بھی باہر نکالا۔
مقامی لوگوں کا کہنا ہے کہ موٹر سائیکل میں آگ لگنے کی وجہ سے کار میں بھی آگ لگنے کا خدشہ تھا۔ تھوڑی سی بھی تاخیر ہونے پر کار جلنے لگتی اور اس میں موجود افراد کے زندہ جل جانے کا خدشہ تھا۔
کار پر سوار ایک نوجوان کی حالت تشویشناک بتائی جاتی ہے جبکہ بائک پر سوار تین نوجوان زخمی بتائے جاتے ہیں۔ اطلاع ملنے پر پولیس نے گاڑیوں کو قبضے میں لے کر تفتیش شروع کردی ہے ۔