کیا ٹی ٹوینٹی ورلڈ کپ کی ٹیم کا حصہ نہیں ہوں گے وراٹ کوہلی؟

تاثیر،۱۳مارچ ۲۰۲۴:- ایس -ایم- حسن

نئی دہلی،12مارچ: سینئر کرکٹر وراٹ کوہلی کے حوالے سے انتہائی اہم خبر سامنے آئی ہے جس میں کہا جا رہا ہے کہ جون میں کھیلے جانے والے ٹی ٹوئنٹی ورلڈ کپ سے ان کا نام ہٹایا جا سکتا ہے۔ وراٹ 2022 میں کھیلے گئے T20 ورلڈ کپ میں ہندوستان کے لیے ایک اہم کھلاڑی تھے۔ ٹی ٹوینٹی ورلڈ کپ ویسٹ انڈیز اور امریکہ میں کھیلا جانا ہے۔ میڈیا رپورٹس کے مطابق بورڈ آف کنٹرول فار کرکٹ ان انڈیا کا ماننا ہے کہ ویسٹ انڈیز کی سلو پچ وراٹ کوہلی کے مطابق نہیں ہوگی۔اس کے علاوہ رپورٹس میں یہ بات بھی سامنے آئی ہے کہ انڈین کرکٹ ٹیم کے چیف سلیکٹر اجیت اگرکر کو یہ ذمہ داری سونپی گئی ہے کہ وہ وراٹ کوہلی کو نوجوانوں کے لیے راستہ بنانے کے لیے راضی کرنے کی کوشش کر رہے ہیں۔اس کے علاوہ یہ بھی بتایا گیا کہ چیف سلیکٹر نے کوہلی سے ٹی ٹوینٹی کی ضروریات کو پورا کرنے کے لیے اپنا رویہ تبدیل کرنے کی بات کی تھی جس کے بعد انہوں نے افغانستان کے خلاف سیریز میں جارحانہ کرکٹ کھیلنے کی کوشش کی لیکن وہ ناکام رہے۔ ساتھ ہی انگلینڈ کیخلاف کھیلی گئی ٹیسٹ سیریز میں راجکوٹ ٹیسٹ کے دوران بی سی سی آئی کے سکریٹری جئے شاہ نے بھی کوہلی کے بارے میں کچھ نہیں کہا۔ جے شاہ نے تصدیق کی تھی کہ ٹیم انڈیا 2024 کا T20 ورلڈ کپ روہت شرما کی کپتانی میں کھیلے گی، لیکن انہوں نے کہا تھا کہ وہ مناسب وقت پر ان کے کردار پر بات کریں گے۔اب کوہلی کے پاس آئی پی ایل کے ذریعے ٹی 20 ورلڈ کپ میں جگہ بنانے کا واحد راستہ ہے۔ اگر کوہلی آئی پی ایل 2024 میں اچھی کارکردگی کا مظاہرہ کرتے ہیں تو انہیں ٹی 20 ورلڈ کپ کے لیے ہندوستانی ٹیم میں شامل کیا جا سکتا ہے۔ رپورٹ میں بتایا گیا کہ سوریہ کمار یادو، رنکو سنگھ، تلک ورما اور شیوم دوبے جیسے کھلاڑی ٹیم کو آگے لے جانے کے لیے زیادہ موزوں ہیں۔ اب یہ دیکھنا دلچسپ ہوگا کہ کوہلی کو ٹی ٹوینٹی ورلڈ کپ میں جگہ ملتی ہے یا نہیں۔