تاثیر،۱۳مارچ ۲۰۲۴:- ایس -ایم- حسن
نئی دہلی، 12 مارچ: دہلی کی راوس ایونیو کورٹ نے سی بی آئی سے متعلق ایک معاملے میں دہلی ایکسائز گھوٹالے کے ملزم دہلی کے سابق نائب وزیر اعلی منیش سسودیا کی عدالتی تحویل میں 22 مارچ تک توسیع کر دی ہے۔ خصوصی جج ایم کے ناگپال نے یہ حکم دیا۔
سی بی آئی معاملے میں منیش سسودیا کی عدالتی حراست آج ختم ہو رہی تھی، جس کے بعد انہیں عدالت میں پیش کیا گیاتھا۔ 22 فروری کو عدالت نے سسودیا کو آج تک عدالتی حراست میں بھیج دیا تھا۔ 22 فروری کو سی بی آئی نے اس معاملے کی تحقیقات سے متعلق اسٹیٹس رپورٹ کو سیل بند لفافے میں داخل کیا تھا۔ 5 فروری کو عدالت نے انہیں آج تک عدالتی تحویل میں بھیج دیا۔ 5 فروری کو ہی عدالت نے سسودیا کو اپنی بیمار بیوی سے ملنے کے لیے ہفتے میں ایک دن کی حراستی پیرول دی تھی۔
قابل ذکر ہے کہ سسودیا نے اپنی ضمانت کی درخواست مسترد کیے جانے کے خلاف سپریم کورٹ میں کیوریٹو پٹیشن دائر کی ہے، جو ابھی زیر التوا ہے۔ سسودیا کو سی بی آئی نے 26 فروری 2023 کو گرفتار کیا تھا۔
25 نومبر 2022 کو سی بی آئی نے پہلی چارج شیٹ داخل کی۔ عدالت نے اس سے قبل 15 دسمبر 2022 کو چارج شیٹ کا نوٹس لیا تھا۔ عدالت نے ملزمان کے خلاف تعزیرات ہند کی دفعہ 120بی اور انسداد بدعنوانی ایکٹ کی دفعہ 7، 7اے اور 8 کے تحت الزامات طے کیے تھے۔ پہلی چارج شیٹ میں جن ملزمان کے خلاف عدالت نے نوٹس لیا ،ان میں کلدیپ سنگھ، نریندر سنگھ، وجے نائر، ابھیشیک بوئن پلی، ارون رام چندر پلئی، متھو گوتم اور سمیر مہندرو شامل ہیں۔