تاثیر،۱اپریل ۲۰۲۴:- ایس -ایم- حسن
لکھنؤ، یکم اپریل : راشٹریہ لوک دل کے قومی نائب صدر شاہد صدیقی نے لوک سبھا انتخابات کے درمیان پارٹی سے استعفیٰ دے دیا ہے۔ انہوں نے اپنا استعفیٰ قومی صدر جینت چودھری کو بھیج دیا ہے۔ اپنے استعفیٰ میں انہوں نے کہا ہے کہ وہ جمہوریت کو ختم ہوتے نہیں دیکھ سکتے۔
لوک سبھا انتخابات 2024 کا انتخابی بگل بج گیا ہے۔ اس انتخابی سیاست میں لیڈران مسلسل پارٹیاں بدل رہے ہیں اور سیاسی دھڑے بندی دیکھنے کو مل رہی ہے۔ راشٹریہ لوک دل میں یہ رجحان رکنے کا نام نہیں لے رہا ہے۔ اسی سلسلے میں آر ایل ڈی کے قومی نائب صدر شاہد صدیقی نے پارٹی سے استعفیٰ دے دیا ہے۔ ان کے استعفیٰ سے مغربی اترپردیش میں آر ایل ڈی کی انتخابی تیاریوں کو دھچکا لگا ہے۔
اپنے استعفیٰ کے حوالے سے انہوں نے سوشل میڈیا پلیٹ فارم ایکس (سابقہ ٹویٹر) پر یکے بعد دیگرے تین پوسٹس کرکے وجوہات بھی بتائی ہیں۔ انہوں نے پوسٹ میں لکھا کہ میں نے اپنا استعفیٰ راشٹریہ لوک دل کے صدر کو بھیج دیا ہے۔ میں خاموشی سے ملک کے جمہوری ڈھانچے کو ختم ہوتے نہیں دیکھ سکتا۔ میں جینت سنگھ اور آر ایل ڈی میں اپنے ساتھیوں کا شکر گزار ہوں۔
انہوں نے جینت چودھری کے نام اپنے خط میں لکھا کہ ہم نے چھ سال تک ساتھ کام کیا ہے اور ایک دوسرے کا احترام کرتے ہیں۔ ایک طرح سے، آپ کو ہم مرتبہ سے زیادہ چھوٹے بھائی کے طور پر دیکھتا ہوں۔ ہم اہم ایشوز پر کندھے سے کندھا ملا کر کھڑے ہوئے ہیں اور مختلف کمیونٹیز کے درمیان بھائی چارے اور احترام کا ماحول پیدا کیا ہے۔ کوئی بھی سیکولرازم اور آئینی اقدار کے تئیں آپ کی وابستگی پر شک نہیں کر سکتا جن کی ہم دونوں قدر کرتے ہیں۔ آپ کے آنجہانی دادا، بھارت رتن چودھری چرن سنگھ جی، آپ کے آنجہانی والد اجیت سنگھ جی اور آپ کے وقت سے لے کر، آپ اور درحقیقت آپ کی بنائی ہوئی پارٹی ان اقدار کے لیے کھڑی ہے۔