تاثیر،۲۷ اپریل ۲۰۲۴:- ایس -ایم- حسن
کولکاتہ ، 27 اپریل : بی جے پی لیڈر دلیپ گھوش نے سندیشکھالی میں شیخ شاہجہاں کے قریبی ساتھی کے گھر سے بھاری مقدار میں ہتھیار برآمد کرنے کے لیے این ایس جی کمانڈوز کی تعیناتی پر ممتا بنرجی پر سخت حملہ کیا ہے۔ انہوں نے کہا ہے کہ ممتا نے بنگال کو مکمل طور پر برباد کر دیا ہے۔ اب ایک وقت آنے والا ہے جب ترنمول کانگریس کے رہنماؤں کے گھروں کی تلاشی کے لیے فوج کو تعینات کرنا پڑ سکتا ہے۔ بردوان درگاپور سے بی جے پی کے امیدوار دلیپ گھوش نے ہفتہ کی صبح کہا ، تصور کیجیے کہ یہاں ووٹنگ کے لیے سی آر پی ایف کو لانا پڑا۔ آج ہتھیار برآمد کرنے کے لیے کمانڈوز کو لانا پڑا۔ پولیس کا کوئی فائدہ نہیں ہے۔اس کے بعد بشیرہاٹ ضلع پولیس کو نشانہ بناتے ہوئے انہوں نے کہا ، شاہجہاں سی پی ایم دور میں پستول لے کر گھومتا تھا۔ اب وہ اے کے- 47 اور غیر ملکی ہتھیاروں کے ساتھ گھومتا ہے۔ ان کا گھر ہی ایک تھانہ ہے۔ انہوں نے یہ بھی کہا کہ بنگال کو دہشت گردوں کی افزائش گاہ بنا دیا گیا ہے۔