تاثیر،۲۵ اپریل ۲۰۲۴:- ایس -ایم- حسن
پٹنہ، 25 اپریل: بہار میں شدید گرمی سے لوگ پریشان ہیں۔ خاص طور پر اسکول جانے والے بچوں کو کافی پریشانی کا سامنا کرنا پڑ رہا ہے۔ ان دنوں پٹنہ میں درجہ حرارت 42 ڈگری سیلسیس تک پہنچ رہا ہے۔ بچوں پر اس موسم کے اثرات کو دیکھتے ہوئے ڈی ایم نے ایک بار پھر اسکول کے اوقات میں تبدیلی کی ہے۔پٹنہ کے ضلع مجسٹریٹ کپل اشوک نے جمعرات کے روز یہ حکم جاری کیا۔ ضلع مجسٹریٹ نے پٹنہ ضلع کے تمام نجی/سرکاری اسکولوں (بشمول پری اسکول اور آنگن باڑی مراکز) میں دسویں جماعت تک کی تمام کلاسوں کے لیے صبح 10.30 بجے تک تعلیمی سرگرمیاں کرنے کا حکم دیا ہے۔ اس سے قبل تعلیمی سرگرمیاں صبح ساڑھے گیارہ بجے تک رکھی جاتی تھیں۔ضلع مجسٹریٹ نے حکم جاری کرتے ہوئے کہا ہے کہ ہندوستانی محکمہ موسمیات کی پیشن گوئی کے مطابق پٹنہ ضلع میں شدید گرمی اور لو کے حالات ہیں ، جس کی وجہ سے بچوں کی صحت اور زندگی پر منفی اثرات پڑنے کا خدشہ ہے۔ ایسی صورت حال میں پٹنہ ضلع کے تمام نجی/سرکاری اسکولوں (بشمول پری اسکول اور آنگن باڑی مراکز) میں دسویں جماعت تک کی تمام کلاسوں کی تعلیمی سرگرمیاں صبح 10.30 بجے سے شام 4.00 بجے تک ہوں گی اور 11ویں اور 12ویں جماعت کے لیے تعلیمی سرگرمیاں صبح 11.30 بجے سے شام 4.00 بجے تک ہوگی ہے۔حکم نامے میں کہا گیا ہے کہ اسکول انتظامیہ کو مذکورہ حکم کے مطابق تعلیمی سرگرمیوں کو دوبارہ ترتیب دینے کی ہدایت کی گئی ہے۔ یہ حکم پٹنہ ضلع میں 26 اپریل سے نافذ ہوگا اور 30 اپریل تک نافذ رہے گا۔