تاثیر،۴ اپریل ۲۰۲۴:- ایس -ایم- حسن
لکھنؤ، 04 اپریل : ٹکٹ کو لے کر سماج وادی پارٹی میں کشمکش کا سلسلہ تھمنے کا نام نہیں لے رہا ہے۔ رام پور اور مرادآباد کے بعد میرٹھ لوک سبھا سیٹ پر بھی رسہ کشی جاری ہے۔ ایسے میں امیدوار بنائے گئے اتل پردھان نے بدھ کو نامزدگی کے بعد ٹکٹ کاٹے جانے کے معاملے پر اپنی اسمبلی کی رکنیات سے استعفیٰ دینے کا بیان دیا تھا۔ جمعرات کو اتل پردھان نے اپنا بیان واپس لے لیا اور ایک نیا بیان جاری کرتے ہوئے کہا کہ سماج وادی پارٹی کے قومی صدر اکھلیش یادو جیسا کہتے ہیں، وہ ان کے فیصلے کا خیر مقدم کریں گے۔
قابل ذکر ہے کہ اتل پردھان بدھ کی رات سے ہی استعفیٰ کی بات کر رہے تھے۔ انہوں نے کہا کہ اگر انہیں میرٹھ لوک سبھا کا ٹکٹ ملتا ہے تو وہ یوپی اسمبلی کی رکنیت سے بھی استعفیٰ دے دیں گے لیکن جیسے ہی لکھنؤ میں پارٹی قیادت نے ان سے بات کی، اتل پردھان کا یہ بیان سوشل میڈیا پر جاری ہوا۔
قابل ذکر ہے کہ ایس پی نے میرٹھ سے اتل پردھان کا لوک سبھا ٹکٹ منسوخ کر دیا ہے۔ ان کی جگہ سنیتا ورما کو نامزدگی کے آخری دن سے چند گھنٹے قبل بدھ کی رات ٹکٹ دیا گیا تھا۔ سنیتا ورما یوگیش ورما کی بیوی ہیں جو کئی مقدمات میں مطلوب ہے۔ اب ایس پی کی مشکلات میں اضافہ ہوتا نظر آرہا ہے کیونکہ مرادآباد میں ڈاکٹر ایس ٹی حسن اور روچی ویرا کے ساتھ کچھ ٹھیک نہیں چل رہا ہے۔ ایس ٹی حسن کا ٹکٹ منسوخ کر کے روچی ویرا کو ٹکٹ دیا گیا جس کے بعد ایس ٹی حسن کے حامی اس کے خلاف احتجاج کر رہے ہیں۔ اسی دوران قومی صدر اکھلیش یادو کا ایک خط بھی وائرل ہوا تھا جس میں انہوں نے روچی ویرا کا ٹکٹ منسوخ کر کے ایس ٹی حسن کو دیا تھا، لیکن وقت پر خط نہ ملنے کی وجہ سے روچی ویرا کو فائدہ ہوا۔