تاثیر،۱اپریل ۲۰۲۴:- ایس -ایم- حسن
پورنیہ، یکم اپریل:سابق ایم پی پپو یادو نے انڈیا اتحاد کا امیدوار بنانے کے لئے کانگریس میں اپنی پارٹی کو ضم کر دیا لیکن انہیں اس وقت بڑا جھٹکا لگا جب لالو یادو نے جے ڈی یو سے آر جے ڈی میں آئی بیما بھارتی کو لالٹین کا نشان دیا۔ حالانکہ پپو اب بھی الیکشن لڑنے پر بضد ہیں۔ جبکہ بیما بھارتی کا کہنا ہے کہ انہیں اس بارے میں کوئی اطلاع نہیں ہے لیکن اگر یہ سچ ہے تو بھی میں ان سے اپیل کرنا چاہوں گی کہ وہ این ڈی اے کو شکست دینے میں ہمارا ساتھ دیں۔ وہاں دوسرے مرحلے میں 26 اپریل کو ووٹنگ ہونی ہے۔
بیما بھارتی نے کہا کہ پپو یادو کے پورنیہ سے الیکشن لڑنے کے بارے میں انہیں اس کی کوئی اطلاع نہیں ہے۔ حالانکہ انہوں نے یہ ضرور کہا کہ پپو یادو نے اپنی پارٹی کو کانگریس میں ضم کر دیا ہے، اس لیے وہ اس اتحاد کا حصہ ہیں۔ ایسے میں اتحاد دھرم پر عمل کرنا ضروری ہے۔بیما بھارتی نے اویسی کی پارٹی کے پورنیہ سے الیکشن لڑنے کے سوال پر اپنی جیت کا دعویٰ کرتے ہوئے کہا کہ ان کا انڈیا اتحاد پر کوئی اثر نہیں پڑے گا۔ اویسی کی پارٹی کا پورنیہ میں کوئی اثر نہیں ہے ، یہ کہیں نظر نہیں آئے گا۔ پورنیہ کے لوگ ان کے ساتھ ہیں اور ان کی جیت میں مدد کریں گے۔آر جے ڈی امیدوار بیما بھارتی نے کہا کہ پورنیہ میں کئی مسائل ہیں۔ یہاں ابھی کافی ترقی باقی ہے ، پورنیہ کے لوگوں کے جو بھی مسائل ہیں ان کو حل کیا جائے گا۔ انہوں نے کہا کہ انتہائی پسماندہ لوگ جاگ چکے ہیں ، اس بار ان کی طاقت نظر آئے گی۔ انہوں نے کہا کہ وہ ضلع پورنیہ کے ایک غریب گھرانے کی بیٹی اور بہو ہیں، تمام طبقات کے لوگ بشمول انتہائی پسماندہ لوگ انہیں ووٹ دینے کے لیے تیار ہیں۔