تاثیر،۷ اپریل ۲۰۲۴:- ایس -ایم- حسن
نئی دہلی، 07 اپریل:ممبئی انڈینز نے اتوار کو انڈین پریمیئر لیگ (آئی پی ایل) 2024 میں اپنی پہلی جیت درج کی۔ پہلے تین میچ ہارنے کے بعد، ہاردک پانڈیا کی قیادت میں ممبئی انڈینس نے اتوار کو دہلی کیپٹلس کو 29 رنز سے شکست دی۔اس کے ساتھ ہی ممبئی انڈینس نے پوائنٹس ٹیبل پر کامیابی حاصل کر لی ہے۔ ممبئی کی ٹیم 4 میچوں میں ایک جیت اور تین ہار کے ساتھ آٹھویں نمبر پر آ گئی ہے۔ وہیں اس شکست کے ساتھ ہی دہلی کی ٹیم آخری پوزیشن یعنی 10ویں پوزیشن پر کھسک گئی ہے۔ ٹیم کے 5 میچوں میں 4 ہار اور ایک جیت کے ساتھ 2 پوائنٹس ہیں۔وانکھیڑے اسٹیڈیم، ممبئی میں کھیلے گئے میچ میں ممبئی انڈینز نے پہلے بیٹنگ کرتے ہوئے مقررہ 20 اوورز میں 5 وکٹوں پر 234 رنز کا بڑا اسکور بنایا۔ جواب میں دہلی کیپٹلس کی ٹیم 20 اوور میں 8 وکٹوں کے نقصان پر صرف 205 رن ہی بنا سکی۔235 رنز کے بڑے ہدف کا تعاقب کرنے اتری دہلی کیپٹلس کی شروعات اچھی نہیں رہی۔ ٹیم کو پہلا جھٹکا 22 کے اسکور پر لگا۔ ڈیوڈ وارنر صرف 10 رنز بنانے کے بعد آؤٹ ہوئے۔ اس کے بعد پرتھوی شا نے ابھیشیک پورل کے ساتھ مل کر اننگز کو آگے بڑھایا۔ دونوں نے محتاط انداز میں بلے بازی کی اور پاور پلے یعنی پہلے چھ اوورز میں ٹیم کا اسکور 46 رنز تک پہنچا دیا۔
اس کے بعد پرتھوی شا نے 31 گیندوں میں اپنے آئی پی ایل کیریئر کی 13ویں نصف سنچری بنائی۔ تاہم وہ اپنی نصف سنچری میں اضافہ نہ کر سکے۔ 12ویں اوور میں 110 کے مجموعی اسکور پر پرتھوی شا 40 گیندوں میں 8 چوکوں اور 3 چھکوں کی مدد سے 66 رنز بنانے کے بعد آؤٹ ہوئے۔ دہلی کا تیسرا وکٹ ابھیشیک پورل کی صورت میں گرا۔ پورل 31 گیندوں میں پانچ چوکوں کی مدد سے 41 رنز بنانے کے بعد آؤٹ ہوئے۔ کپتان رشبھ پنت بھی جلد آؤٹ ہو گئے۔ پنت صرف 1 رن کا اضافہ کر سکے۔
تاہم ٹرسٹن اسٹبس دوسرے اینڈ سے شاندار بلے بازی کرتے رہے لیکن بھاری ہدف کے سامنے ان کی اننگز کام نہ آ سکی۔ ٹریسٹن 25 گیندوں پر 3 چوکوں اور 7 چھکوں کی مدد سے 71 رنز بنانے کے بعد ناٹ آؤٹ رہے۔
ممبئی کی جانب سے گیرالڈ کوٹزی نے 4، جسپریت بمراہ نے 2 اور روماریو شیفرڈ نے ایک وکٹ حاصل کی۔
اس سے قبل ٹاس ہار کر پہلے بلے بازی کرتے ہوئے ممبئی نے 20 اوور میں 5 وکٹ پر 234 رنز کا بڑا اسکور بنایا۔ ٹیم کو اوپنرز روہت شرما اور ایشان کشن نے تیز شروعات کی۔ روہت صرف ایک رن سے نصف سنچری بنانے سے محروم رہے۔ روہت نے 27 گیندوں میں چھ چوکوں اور تین چھکوں کی مدد سے 49 رنز بنائے۔ ایشان نے 23 گیندوں میں چار چوکوں اور دو چھکوں کی مدد سے 42 رنز بنائے۔
ان دونوں کے علاوہ ہاردک پانڈیا نے 33 گیندوں میں 39 رنز بنائے۔ ایک وقت میں ممبئی انڈینز کا اسکور 17 اوورز میں چار وکٹ پر 167 رنز تھا لیکن اس کے بعد آخری اوورز میں ٹم ڈیوڈ اور روماریو شیفرڈ نے طوفانی بیٹنگ کرتے ہوئے ٹیم کا اسکور 234 رنز تک پہنچا دیا۔ روماریو شیفرڈ نے اینریک نورٹجے کے 20ویں اوور میں 32 رنز بنائے۔ روماریو نے 10 گیندوں پر 3 چوکوں اور 4 چھکوں کی مدد سے ناقابل شکست 39 اور ٹم ڈیوڈ نے 21 گیندوں پر 2 چوکوں اور 4 چھکوں کی مدد سے ناقابل شکست 45 رنز بنائے۔
دہلی کی جانب سے اکشر پٹیل نے 2، اینرک نورٹجے نے 2 اور خلیل احمد نے ایک وکٹ حاصل کی۔