تاثیر،۱۳ مئی ۲۰۲۴:- ایس -ایم- حسن
غزہ ، 13 مئی:غزہ میں اسرائیلی فوج پر حماس کے تابڑ توڑ حملے جاری ہیں، مشرقی رفح اور جبالیہ میں گھمسان کا رن پڑ گیا ہے۔الجزیرہ کے مطابق شمالی غزہ میں شدید لڑائی کی اطلاع ہے، جہاں اسرائیلی فوج کا کہنا ہے کہ وہ حماس کے عسکریت پسندوں کا مقابلہ کر رہی ہے، جب کہ حماس نے کہا ہے کہ چوبیس گھنٹوں میں انھوں نے دشمن کے 9 صہیونی ٹینک اور فوجی گاڑیاں تباہ کر دی ہیں۔القسام بریگیڈ کے مطابق مشرقی جبالیہ میں اسرائیلی فورسز پر تابڑ توڑ حملے کیے گئے ہیں، حماس کے مسلح ونگ نے اپنے ٹیلی گرام چینل پر کہا کہ آج صبح سے اس کے جنگجوؤں نے اسرائیلی فوج کے ایک ٹھکانے کو دھماکے سیا ڑا دیا ہے۔ان حملوں میں 9 اسرائیلی ’مرکاوا‘ ٹینک اور بکتر بند گاڑیاں تباہ کی گئیں، ایک بوبی ٹریپ مکان کو دھماکے سے اڑایا گیا جس میں اسرائیلی فوجی موجود تھے، ایک ایسے گھر کو بھی ٹی بی جی گولوں سے نشانہ بنایا گیا جس میں اسرائیلی اسپیشل فورسز کا ایک گروپ موجود تھا، ایک صہیونی ٹینک کو ڈرون (UAV) کے ذریعے اڑایا گیا، جنوبی اسرائیل کے شہروں عسقلان اور سدیروت پر گولہ باری کی گئی، جبالیہ پناہ گزین کیمپ کے مشرق میں المبوح کے علاقے میں اسرائیلی فوجیوں اور گاڑیوں کے ایک گروپ کو مارٹر گولوں سے نشانہ بنایا گیا۔حماس کے جوابی وار میں متعدد اسرائیلی مارے گئے ہیں، صہیونی فوج نے ایک افسر سمیت 50 اہلکاروں کے زخمی ہونے کی تصدیق کر دی ہے۔دوسری طرف الجزیرہ کے مطابق اسرائیلی فوجی ٹینکوں نے شمالی غزہ میں ایک نئے حملے میں جبالیہ پناہ گزین کیمپ میں اندر تک مارچ شروع کر دیا ہے۔