تاثیر،۹ مئی ۲۰۲۴:- ایس -ایم- حسن
نارائن پور، 9 مئی (ہ س)۔ دہلی نے جمعرات کو یہاں رام کرشنا مشن آشرم گراؤنڈ میں کیرالہ کو ٹائی بریکر میں شکست دے کر سوامی وویکانند انڈر 20 مردوں کی قومی فٹ بال چیمپئن شپ کے سیمی فائنل میں داخلہ حاصل کیا۔ کرناٹک اور منی پور کے بعد دہلی سیمی فائنل کے لیے کوالیفائی کرنے والی تیسری ٹیم بن گئی ہے۔
میچ کے ہاف ٹائم میں کیرالہ 1-2 سے آگے تھی لیکن دہلی نے 65ویں منٹ تک واپسی کرتے ہوئے 2-3 کی برتری حاصل کر لی۔ تاہم کیرالہ نے 73ویں منٹ میں گول برابر کر دیا۔
کیرالہ نے میچ کے 16ویں منٹ میں اس وقت برتری حاصل کی جب اسٹرائیکر احمد انفاس نے بائیں جانب سے کراس کو گول پوسٹ کی طرف کیا۔ دہلی نے کارنر کک سے آٹھ منٹ بعد برابری کر دی جب سونم تسیوانگ لوکھم نے شاندار ہیڈر گول کیا۔
ہاف ٹائم سے پہلے، انفاس نے ایک بار پھر محافظوں کو چکما دیا اور گول کرکے کیرالہ کو 1-2 سے آگے کردیا۔
دوسرے ہاف میں رمیش چھتری نے 60ویں منٹ میں گول کرکے دہلی کو 2-2 سے برابر کردیا۔ پانچ منٹ بعد متبادل کھلاڑی اکشے راج سنگھ نے گول کر کے اسکور کو 2-3 کر دیا لیکن شانو اسٹیلس نے کارنر کک کا فائدہ اٹھایا اور گول کر کے کیرالہ کو 3-3 سے برابر کر دیا۔
مقررہ وقت کے اختتام پر دونوں ٹیمیں 3-3 گول سے برابر تھیں۔ اس کے بعد 30 منٹ کے اضافی وقت میں بھی دونوں ٹیمیں کوئی گول نہ کر سکیں جس کے بعد ٹائی بریکر کا سہارا لیا گیا۔ ٹائی بریکر میں دہلی نے اپنے حریفوں پر سبقت حاصل کی اور 1-4 سے جیت حاصل کی۔ دہلی کے گول کیپر کرن مکڑ نے دو پنالٹی ککس بچا کر اپنی ٹیم کی جیت میں اہم کردار ادا کیا۔ مکڑ کو میچ کا بہترین کھلاڑی قرار دیا گیا۔
ایس ٹی لاملین، رتوراج موہن، کامگینسائی توتھانگ اور اکشے راج سنگھ نے ٹائی بریکر میں دہلی کے لیے گول کئے۔ کیرالہ کے لیے صرف اکشے کمار سبیدی ہی گول کر سکے۔