تاثیر،۲۵ مئی ۲۰۲۴:- ایس -ایم- حسن
کاٹھمنڈو ، 25 مئی: ہفتہ کو بھی نائب وزیراعظم اور وزیر داخلہ کے خلاف پارلیمانی انکوائری کمیٹی بنانے پر کوئی اتفاق رائے نہیں ہو سکا۔ گزشتہ ایک ہفتے سے مسلسل جاری ورکنگ گروپ کے اجلاسوں میں گھنٹوں بیٹھنے کے بعد بھی یہی صورتحال ہے۔آج بھی کوآپریٹو گھوٹالے میں وزیر داخلہ روی لامچھانے کے رول کی تحقیقات کے لیے بڑی پارٹیوں کی طرف سے بنائے گئے ورکنگ گروپ میں کمیٹی کے مینڈیٹ کے بارے میں کوئی اتفاق رائے نہیں ہو سکا۔ کمیٹی کے مینڈیٹ میں وزیر داخلہ کا نام ہونا چاہیے یا نہیں اس پر ابھی تک تنازعہ موجود ہے۔ اگر حکمراں پارٹی کسی بھی حالت میں وزیر داخلہ روی لامچھانے کا نام دینے پر راضی نہیں ہے تو اپوزیشن اس نام کے بغیر اسے ماننے کو تیار نہیں ہے۔ دونوں فریق ایک دوسرے پر اتفاق رائے نہ ہونے کا الزام لگا رہے ہیں۔
حکمران جماعت اور اپوزیشن کے درمیان اتفاق رائے نہ ہونے کی وجہ سے بجٹ اجلاس کے ایک دن بھی پارلیمنٹ کی کارروائی نہیں ہو سکی۔ اپوزیشن جماعتوں کی جانب سے دونوں ایوانوں کی کارروائی روکی جارہی ہے۔ ابھی تک نہ تو صدر کے خطاب پر شکریہ کی تحریک پیش کی گئی اور نہ ہی بجٹ پیش کیا گیا۔وزیر قانون پدم گری جو ورکنگ گروپ کے کنوینر تھے، نے کہا کہ اپوزیشن کی بات منطقی نہیں ہے۔ انہوں نے کہا کہ بغیر تحقیقات کے وزیر داخلہ کو قصور وار لکھ کر کوئی تحقیقاتی کمیٹی نہیں بنائی جا سکتی لیکن اپوزیشن جماعتیں حکومت کے اس استدلال سے متفق نہیں ہیں۔ نیپالی کانگریس کے گیانیندر کارکی جو ورکنگ گروپ کے رکن تھے، نے کہا کہ اب تک کی تمام تحقیقات میں وزیر داخلہ کو قصوروار پایا گیا ہے۔ اس لیے اس کا نام لکھنا پڑے گا۔ کارکی نے کہا کہ کوآپریٹو اداروں سے پیسے نکال کر غیر قانونی طریقے سے پیسہ لگانے والے گورکھا میڈیا کا نام بھی بتایا جائے اور پارلیمانی کمیٹی بنائی جائے۔