تاثیر،۱۲ مئی ۲۰۲۴:- ایس -ایم- حسن
نئی دہلی ،12مئی :ایشیائی چمپئن امن سہراوت نے ترکی میں ورلڈ ریسلنگ اولمپک کوالیفائر میں مردوں کے 57 کلوگرام فری اسٹائل زمرے میں ہندوستان کے لیے پیرس 2024 کا کوٹہ حاصل کیا۔ جبکہ دیپک پونیا ناکام رہے۔ وہ پہلے راؤنڈ میں ہی باہر ہو گئے تھے۔ یہ ہندوستان کے لیے چھٹا پیرس اولمپکس 2024 ریسلنگ کوٹہ ہے، جبکہ مردوں کے زمرے میں پہلا۔ پچھلے پانچوں کوٹے ہندوستانی خواتین پہلوانوں نے جیتے تھے۔انڈر 23 ورلڈ چمپئن سہراوت نے سیمی فائنل میں ڈیموکریٹک پیپلز ریپبلک آف کوریا کے چونگ سونگ ہان کو 12-2 سے شکست دی۔ استنبول مقابلہ پہلوانوں کے لیے آئندہ اولمپک گیمز کے لیے کوٹہ حاصل کرنے کا آخری موقع ہے۔ ہر وزن کے زمرے میں تین کوٹے داؤ پر لگے ہوئے ہیں۔امن نے اپنے دونوں میچ آسانی سے جیت لیے۔ پہلے اس نے جوزی ویلنٹینوف کو 10-4 سے شکست دی۔ اس کے بعد امن نے یوکرین کے آندرے یاتسینکو کو شکست دی۔ یاتسینکو نے بھارتی پہلوان کو چیلنج کیا لیکن امن بہت مضبوط ثابت ہوئے۔ امن نے اپنے حریف کو ‘ٹیک ڈاون’ کرنے کے بعد تکنیکی برتری سے کامیابی حاصل کی۔ انہوں نے شمالی کوریا کے چونگ سونگ ہان کو 12-2 کے فرق سے شکست دی۔