تاثیر،۴ مئی ۲۰۲۴:- ایس -ایم- حسن
غزہ، 04مئی:خدمت کے جذبے سے سرشار پاکستانی نژاد امریکن ڈاکٹر غزہ جاکر زخمی فلسطینیوں کا علاج کرنے میں مصروف ہوگئے۔غیر ملکی ذرائع ابلاغ کے مطابق غزہ جانیوالی پاکستانی حنا چیمہ گائناکالوجسٹ اور خواجہ اکرام آرتھوپیڈک ڈاکٹر ہیں۔ڈاکٹر خواجہ اکرام کا کہنا تھا کہ غزہ میں زخمیوں کی سب سے بڑی تعداد بچوں کی ہے، وہاں میلوں تک امدادی ٹرک کھڑے ہیں مگر امداد کو غزہ میں جانے نہیں دیا جارہا۔ڈاکٹر حنا چیمہ کا کہنا تھا کہ فلسطین کو اس وقت سب سے زیادہ جنگ بندی کی ضرورت ہے، شکر گزار ہوں کہ میرے پاس امریکا واپسی کاموقع ہے، فلسطینیوں کے پاس نہیں۔واضح رہے کہ غزہ میں اسرائیلی فوج کی بربریت کے باعث 30ہزار سے زائد فلسطینی جام شہادت نوش کرچکے ہیں، جن میں بچوں اور خواتین کی بہت بڑی تعداد شامل ہے۔