تاثیر۲ جون ۲۰۲۴:- ایس -ایم- حسن
نئی دہلی ،02جون:ٹی ٹوئنٹی عالمی کپ 2024 کے پہلے میچ میں امریکہ نے کینیڈا کو شکست دے دی یہ میچ امریکہ 7 وکٹوں سے جیت گیا۔ میچ میں امریکہ نے ٹاس جیت کر بولنگ کا فیصلہ کیا جو مکمل طور پر ان کے حق میں گیا۔ ہدف کا تعاقب کرتے ہوئے، ایرون جونز نے امریکہ کی جانب سے سب سے بڑی اننگز کھیلی، انہوں نے 40 گیندوں پر 4 چوکوں اور 10 چھکوں کی مدد سے 94 رنز بنائے۔ اس کے علاوہ اینڈریز گس نے 46 گیندوں پر 7 چوکوں اور 3 چھکوں کی مدد سے 65 رن بنائے۔ دونوں نے تیسری وکٹ کے لیے 131 رنز (58 گیندوں) کی شاندار شراکت داری کی۔
ڈلاس کے گرینڈ پریری اسٹیڈیم میں کھیلے گئے میچ میں پہلے بیٹنگ کرتے ہوئے کینیڈا نے مقررہ 20 اوورز میں 5 وکٹوں پر 194 رنز بنائے۔ نونیت دھالیوال نے ٹیم کے لیے سب سے بڑی اننگز کھیلی اور 44 گیندوں میں 6 چوکوں اور 3 چھکوں کی مدد سے 61 رنز بنائے۔ اس کے بعد امریکہ نے ہدف کا تعاقب کرتے ہوئے 17.4 اوورز میں فتح درج کی۔ کینیڈین گیند باز امریکی بلے بازوں کے سامنے بالکل بے بس نظر آئے۔
195 رنز کے ہدف کے تعاقب میں امریکہ کی شروعات انتہائی خراب رہی۔ ٹیم کی پہلی وکٹ پہلے ہی اوور کی دوسری گیند پر اسٹیون ٹیلر کی صورت میں گری جو کھاتہ کھولے بغیر ہی پویلین لوٹ گئے۔ اس کے بعد کپتان موناک پٹیل اور اینڈریز گس نے دوسری وکٹ کے لیے 42 (37 گیندوں) کی شراکت داری کی۔ یہ شراکت داری 7ویں اوور کی تیسری گیند پر کپتان پٹیل کی وکٹ کے ساتھ ختم ہوئی۔ موناک نے 16 گیندوں میں 2 چوکوں کی مدد سے 16 رنز کی اننگز کھیلی۔
اس کے بعد اینڈریز گوس اور ایرون جونز نے تیسری وکٹ کے لیے 131 (58 گیندوں) کی تیز شراکت داری کی۔ اس شراکت داری نے مقابلہ امریکہ کے حق میں کر دیا۔ اس شراکت داری کے بعد امریکہ کے لیے مقابلہ یک طرفہ ہو گیا۔ یہ شاندار شراکت 16ویں اوور کی چوتھی گیند پر اینڈریز گس کی وکٹ کے ساتھ ختم ہوئی۔ اینڈریز نے 46 گیندوں پر 7 چوکوں اور 3 چھکوں کی مدد سے 65 رنز کی اننگز کھیلی۔
اس کے بعد کوری اینڈرسن اور ایرون جونز نے چوتھی وکٹ کے لیے 24* (12 گیندوں) کی ناقابل شکست شراکت داری بنا کر امریکا کو فتح دلائی۔ جونز نے 94* رنز بنائے، جبکہ اینڈرسن 5 گیندوں میں 3 رنز بنانے کے بعد ناٹ آؤٹ رہے۔