تاثیر۲ جون ۲۰۲۴:- ایس -ایم- حسن
ممبئی، 2 جون :شیوسینا-ادھو بالاصاحب ٹھاکرے کے ایم پی سنجے راوت نے اتوار کے روز ایگزٹ پول کو “کارپوریٹ گیم اور دھوکہ دہی” قرار دیتے ہوئے دعویٰ کیا کہ میڈیا کمپنیوں پردباؤ ہے اورانڈیا اتحاد کل 48 میں سے 35 سے زیادہ سیٹیں جیت لے گی۔ممبئی میں نامہ نگاروں سے بات کرتے ہوئے راجیہ سبھا کے رکن نے دعویٰ کیا کہ اپوزیشن انڈیا بلاک 543 رکنی لوک سبھا میں 295 سے 310 سیٹیں جیت کرحکومت بنائے گا۔ راؤت نے یہ بھی کہا کہ انہیں ایگزٹ پولز کی ضرورت نہیں ہے کیونکہ وہ میدان میں کام کرتے ہیں اور “انڈر کرنٹ” کو جانتے ہیں۔ایگزٹ پولز نے ہفتہ کے روز پیش گوئی کی ہے کہ وزیر اعظم نریندر مودی مسلسل تیسری مدت کے لئے اقتدار برقرار رکھیں گے، بی جے پی زیرقیادت این ڈی اے کے لوک سبھا انتخابات میں بڑی اکثریت حاصل کرنے کی امید ہے۔
راوت نے دعوی کیا، “ان میڈیا کمپنیوں پر بہت دباؤ ہے۔ ایگزٹ پول کی مشق ایک کارپوریٹ گیم اور دھوکہ دہی ہے۔” انھوں نے سوال کیا کہ “کیا یہ کمپنیاں مفت میں ایگزٹ پول کراتی ہیں؟” شیو سینا-یو بی ٹی لیڈر نے دعویٰ کیا کہ اپوزیشن انڈیا اتحاد 295 سے 310 سیٹیں جیت لے گا۔راوت نے کہا کہ مہاراشٹرا میں، مہا وکاس اگھاڑی، جس میں ادھو ٹھاکرے کی سربراہی والی شیو سینا(یو بی ٹی)، کانگریس اور شرد پوار کی قیادت والی این سی پی(ایس پی )شامل ہے، کل 48 میں سے 35 سے زیادہ سیٹیں جیت لے گی۔ انہوں نے کہا شیو سینا 2019 میں اپنی 18 سیٹوں کی تعداد کو برقرار رکھے گی اور کانگریس اور این سی پی بھی اچھی کارکردگی کا مظاہرہ کریں گے۔ این سی پی(ایس پی) لوک سبھا ممبر سپریہ سولے بارامتی میں 1.5 لاکھ سے زیادہ ووٹوں سے جیتیں گی اور کانگریس اپنی بہترین کارکردگی پیش کرے گی۔ راوت نے دعویٰ کیا کہ اتر پردیش، بہار، ہریانہ، کرناٹک مہاراشٹر کے ساتھ ملک میں تبدیلی لائیں گے۔ “ہمیں ایگزٹ پولز کی ضرورت نہیں ہے، ہم میدان میں کام کر رہے ہیں۔ ہم انڈر کرنٹ کو سمجھتے ہیں،” انہوں نے کہا کہ، “انڈیا بلاک یوپی میں80 میں سے 35 سیٹیںجیتے گا اور راشٹریہ جنتا دل (جس کے سربراہی لالو پرساد ہیں) کو بہار میں 40 میں سے 16 سیٹیں ملیں گی،” انہوں نے دعویٰ کیا۔