تاثیر۱۰ جون ۲۰۲۴:- ایس -ایم- حسن
بھوپال، 10 جون: مدھیہ پردیش میں اب مانسون کی دستک شروع ہوگئی ہے۔ مانسون ریاست میں 17 سے 18 جون تک پہنچ سکتا ہے۔ اس سے پہلے ریاست میں پری مانسون سرگرمی ہوگی۔ پیر کی صبح سے ہی وقفے وقفے سے بارش ہو رہی ہے۔ اتوار کو دھار، رتلام، چھندواڑہ سمیت کئی شہروں میں بارش ہوئی، جب کہ نیواری، دموہ اور چھتر پور گرم رہا۔ اسی طرح کا موسم آئندہ ایک ہفتے تک جاری رہنے کا امکان ہے۔ چھندواڑہ، کھنڈوا، برہان پور، ڈنڈوری میں پیر کو تیز بارش اور آندھی کا الرٹ ہے۔
محکمہ موسمیات نے کہا کہ ممبئی میں اتوار کو مانسون نے دستک دے دی ہے۔ دو دن کے بعد بحیرہ عرب اور خلیج بنگال کی برانچ کمزور ہو جائے گی جو ایک ہفتے تک ایسی ہی رہے گی۔ خلیج بنگال کی برانچ 17 اور 18 جون کو فعال ہو گی۔ اس کے بعد مانسون مدھیہ پردیش پہنچ سکتا ہے۔ اس سے پہلے ریاست میں مانسون کے آنے کی امید کم ہے۔ تاہم، ریاست میں ویسٹرن ڈسٹربنس اور سائیکلونک سرکولیشن ابھی بھی سرگرم ہے۔ اس کی وجہ سے ریاست میں طوفان اور بارش کا دور چل رہا ہے۔ اتوار کو دھار، چھندواڑہ، رتلام سمیت کئی شہروں میں آندھی بارش والا موسم رہا۔ دوسری جانب ریاست کے کچھ شہروں میں گرمی کا اثر بھی دیکھنے کو ملا ۔
درجہ حرارت کی بات کریں تو ضلع دموہ میں سب سے زیادہ درجہ حرارت 44.5 ڈگری سیلسیس درج کیا گیا۔ نیواڑی کے پرتھوی پور اور چھتر پور کے بیجاور میں درجہ حرارت 44.2 ڈگری رہا۔ گرم ترین شہروں میں سے ٹیکم گڑھ میں 44 ڈگری، سنگراولی میں 43.8 ڈگری، کھجوراہو میں 43.6 ڈگری، نوگاوں میں 43.5 ڈگری، گوالیار میں 43.4 ڈگری، ستنا اور ریوا میں 42.2 ڈگری درجہ حرارت ریکارڈ کیا گیا۔ راجدھانی بھوپال میں درجہ حرارت 40.9 ڈگری، اندور میں 37.4 ڈگری، جبل پور میں 42.5 ڈگری اور اجین میں 39.7 ڈگری ریکارڈ کیا گیا۔ سب سے کم درجہ حرارت پچمڑھی میں 36.2 ڈگری ریکارڈ کیا گیا۔ ملاجکھنڈ-چھندواڑہ میں 37 ڈگری اور دھار میں 37.4 ڈگری رہا۔