تاثیر۲۷ جون ۲۰۲۴:- ایس -ایم- حسن
نئی دہلی ، 27 جون: صدرجمہوریہ ہند دروپدی مرمو نے جمعرات کو پارلیمنٹ کے دونوں ایوانوں سے خطاب کرتے ہوئے کہا کہ پالیسیوں کی مخالفت کرنا اور پارلیمنٹ کی کارروائی میں خلل ڈالنا دو مختلف چیزیں ہیں۔ جب پارلیمنٹ آسانی سے چلتی ہے اور صحت مند بحث ہوتی ہے تو انتظامیہ پر لوگوں کا اعتماد بڑھتا ہے۔صدر مرمو نے تیسری بار نیشنل ڈیموکریٹک الائنس (این ڈی اے) کی حکومت کے قیام کے بعد اپنے پہلے صدارتی خطاب میں جموں و کشمیر میں حال ہی میں ہوئے انتخابات کی ستائش کی اور کہا کہ ان انتخابات نے خلل ڈالنے کی سوچ رکھنے والی قوتوں کو سخت پیغام دیا ہے۔
صدر جمہوریہ نے تمام نو منتخب ارکان پارلیمنٹ کو مبارکباد دی اور 2024 کے لوک سبھا انتخابات کو کامیابی کے ساتھ منعقد کرنے کے لئے الیکشن کمیشن کی تعریف کی۔ انہوں نے کہا کہ آج پوری دنیا میں 2024 کے لوک سبھا انتخابات کا چرچا ہو رہا ہے۔ دنیا دیکھ رہی ہے کہ ہندوستان کے عوام نے مسلسل تیسری بار مستحکم اور واضح اکثریت کے ساتھ حکومت بنائی ہے۔صدر مملکت نے اپنے خطاب میں حکومت کی کامیابیوں کا ذکر کیا اور کہا کہ آئندہ بجٹ مستقبل کے وژن کی دستاویز ہوگا۔ اس میں بڑے معاشی اور سماجی فیصلوں کے ساتھ ساتھ کئی تاریخی اقدامات بھی نظر آئیں گے۔ انہوں نے کہا کہ حکومت کا ماننا ہے کہ دنیا بھر سے سرمایہ کاروں کو راغب کرنے کے لیے ریاستوں کے درمیان صحت مند مقابلہ ہونا چاہیے۔ یہ مسابقتی تعاون پر مبنی وفاقیت کی اصل روح ہے۔
صدر نے کہا کہ اصلاحات ، کارکردگی اور تبدیلی کے عزم نے ہندوستان کو سب سے تیزی سے ترقی کرنے والی معیشت بنا دیا ہے۔ 10 سالوں میں ، ہندوستان 11 ویں درجہ کی معیشت سے بڑھ کر پانچویں نمبر پر آگیا ہے۔ 2021 اور 2024 کے درمیان ہندوستان نے اوسطاً 8 فیصد کی رفتار سے ترقی کی ہے اور یہ ترقی عام اوقات میں نہیں ہوئی ہے۔
انہوں نے کہا کہ گزشتہ 10 سالوں میں اس طرح کی بہت سی اصلاحات ہوئی ہیں جن سے آج ملک کو بہت فائدہ ہو رہا ہے۔ جب یہ اصلاحات کی جا رہی تھیں تب بھی ان کی مخالفت کی گئی تھی اور منفیت پھیلانے کی کوشش کی گئی تھی ، لیکن یہ تمام اصلاحات وقت کی کسوٹی پر ثابت ہوئیں۔ اس سلسلے میں، انہوں نے ہندوستان کے بینکنگ سیکٹر کو تباہی سے بچانے کے لیے 10 سال قبل حکومت کی طرف سے کی گئی بینکنگ اصلاحات کا ذکر کیا۔
صدر جمہوریہ نے کہا کہ حکومت ڈیجیٹل انڈیا اور پوسٹل نیٹ ورک کا استعمال کرتے ہوئے حادثہ اور لائف انشورنس کی کوریج کو بڑھانے پر کام کر رہی ہے۔ انہوں نے کہا کہ مسلح افواج میں اصلاحات کا عمل جاری رہنا چاہیے تاکہ وہ جنگ کے لیے تیار رہیں۔ بینکوں کی مضبوطی انہیں اس قابل بناتی ہے کہ وہ کریڈٹ بیس کو بڑھا سکیں اور ملک کی اقتصادی ترقی میں اپنا حصہ ڈالیں۔ انہوں نے کہا کہ لوک سبھا اور اسمبلیوں میں زیادہ سے زیادہ شرکت کا مطالبہ کرنے والی خواتین کو ویمن ریزرویشن ایکٹ کے ذریعے بااختیار بنایا گیا ہے۔ شمال مشرق میں ترقی کے لیے اقدامات کیے جا رہے ہیں ، حکومت افسپا کو بتدریج ہٹانے کے لیے بھی کام کر رہی ہے۔ حکومت شمال مشرق میں دیرپا امن کے لیے کام کر رہی ہے۔ پچھلے 10 سالوں میں بہت سے پرانے مسائل حل ہو گئے۔
صدرجمہوریہ نے پہلی بار لوک سبھا کے لیے منتخب ہونے والے اراکین اور پرانے اراکین سے پارلیمنٹ کے کام کاج کو احسن طریقے سے چلانے میں تعاون کرنے کی اپیل کی اور کہا کہ آج کا وقت ہر لحاظ سے ہندوستان کے لیے سازگار ہے۔ یہ حکومت کے ساتھ ساتھ پارلیمنٹ کے ہر رکن کی ذمہ داری ہے کہ اس وقت سے ملک کو زیادہ سے زیادہ فائدہ پہنچے۔ انہوں نے کہا کہ پوری دنیا اس بات پر نظر رکھے ہوئے ہے کہ ہندوستان کی حکومت اور پارلیمنٹ کیا فیصلے کرتی ہے اور آنے والے سالوں میں کیا پالیسیاں بناتی ہے۔ صدر مملکت نے کہا کہ پالیسیوں کی مخالفت اور پارلیمانی کام کاج کی مخالفت دو مختلف چیزیں ہیں۔ صدر نے کہا کہ ہمارا مقصد اس بات کو یقینی بنانا ہے کہ کوئی بھی شخص سرکاری اسکیموں سے اچھوتا نہ رہے۔ انہوں نے کہا کہ مجھے پورا بھروسہ ہے کہ آپ 140 کروڑ عوام کی امنگوں کو پورا کرنے کا ذریعہ بنیں گے۔
انہوں نے کہا کہ اکثر مخالفانہ ذہنیت اور تنگ نظری کی وجہ سے جمہوریت کی بنیادی روح کو بہت نقصان پہنچا ہے۔ اس سے پارلیمانی نظام بھی متاثر ہوتا ہے اور ملک کی ترقی کا سفر بھی۔ ملک میں کئی دہائیوں کی غیر مستحکم حکومتوں کے دوران، بہت سی حکومتیں چاہتے ہوئے بھی نہ تو اصلاحات کر سکیں اور نہ ہی ضروری فیصلے کر سکیں۔ ہندوستانی عوام نے فیصلہ کن بن کر اس صورتحال کو بدل دیا ہے۔
نیٹ- یو جی پیپر لیک ہونے اور دیگر امتحانات میں مبینہ بے ضابطگیوں پر اپوزیشن کو نشانہ بناتے ہوئے صدر نے کہا کہ الزامات کی اعلیٰ سطحی تحقیقات کی جا رہی ہیں۔ حکومت مجرموں کو سخت سے سخت سزا دینے کے لیے پرعزم ہے۔ انہوں نے کہا کہ حل تک پہنچنے کے لیے پارٹی سیاست سے اوپر اٹھ کر ملک گیر ٹھوس اقدامات کرنے کی ضرورت ہے۔ انہوں نے کہا کہ سرکاری بھرتیاں ہوں یا امتحانات ، یہ درست نہیں کہ ان میں کسی بھی وجہ سے رکاوٹ پیدا ہو۔ ان میں پاکیزگی اور شفافیت بہت ضروری ہے۔ انہوں نے یہ بھی کہا کہ حکومت نے امتحانات کے دوران غیر منصفانہ ذرائع کے استعمال کے خلاف سخت قانون بنایا ہے۔
25 جون 1975 کو لگائی گئی ایمرجنسی کو یاد کرتے ہوئے صدر نے کہا کہ ایمرجنسی آئین پر براہ راست حملے کا سب سے بڑا اور سیاہ باب تھا۔ انہوں نے کہا کہ میری حکومت بھی آئین ہند کو محض حکمرانی کا ایک ذریعہ نہیں سمجھتی ہے ، بلکہ ہم اس بات کو یقینی بنانے کی کوششیں کر رہے ہیں کہ ہمارے آئین کو عوامی شعور کا حصہ بنایا جائے۔ اسی مقصد کو ذہن میں رکھتے ہوئے میری حکومت نے 26 نومبر کو یوم دستور کے طور پر منانا شروع کیا ہے۔ انہوں نے کہا کہ اب آئین جموں و کشمیر میں مکمل طور پر نافذ ہو چکا ہے ، ہندوستان کے اس خطہ میں ، جہاں آرٹیکل 370 کی وجہ سے حالات مختلف تھے۔