تاثیر۴ جون ۲۰۲۴:- ایس -ایم- حسن
گریڈیہہ، 4 جون: جھارکھنڈ کے گانڈے اسمبلی حلقے کے ضمنی انتخاب میں 25 مئی کو ووٹنگ ہوئی تھی، ووٹوں کی گنتی منگل کو ہوئی۔ اس میں جھارکھنڈ مکتی مورچہ کی امیدوار کلپنا سورین مرمو نے 26 ہزار 490 ووٹوں کے فرق سے اپنی سیاسی زندگی کی پہلی جیت حاصل کی۔ انہوں نے بھارتیہ جنتا پارٹی کے امیدوار دلیپ ورما کو شکست دی۔انتخابی نتائج کے مطابق جے ایم ایم کی کلپنا سورین کو 1 لاکھ 08 ہزار 975 ووٹ ملے جبکہ بی جے پی کے دلیپ ورما کو 82 ہزار 490 ووٹ ملے۔ اس کے ساتھ کلپنا سورین جھارکھنڈ کی سیاست میں ایک مضبوط اور موثر لیڈر بن کر ابھری ہیں۔ اوڈیشہ میں پلنے والی سورین خاندان کی بہو نے جے ایم ایم کے سپریمو ایم پی شیبو سورین اور ان کے شوہر ہیمنت سورین کے جیل میں ہونے کے باوجود جسمانی بیماری کے باوجود اپنی قابلیت سے یہ کارنامہ انجام دیا ہے۔ یہی نہیں، انہوں نے انتخابی مہم کے دوران پارٹی کے حامیوں کو اپنے لیڈر کی کمی محسوس نہیں ہونے دی۔اس الیکشن میں کلپنا سورین نے ایک تجربہ کار مقرر کی طرح مودی حکومت پر تند و تیز حملے کئے، جس کے نتیجے میں ان کی ریلیوں میں زبردست بھیڑ جمع ہوتی رہی۔ اپوزیشن جماعتوں کے لوگ بھی ان کی تقریر سننے کے لیے بڑی تعداد میں پہنچے۔ کلپنا سورین انتخابی جلسوں میں لوگوں کو جذباتی طور پر جوڑنے میں کامیاب رہیں۔ علاقے کے لوگوں نے کلپنا سورین کو نہ صرف ایم ایل اے بلکہ مستقبل کے وزیر اعلیٰ کے لیے ووٹ دیا ہے۔ علاقے کے لوگوں کی امید اور آرزو ہے کہ کلپنا سورین کے سی ایم بننے سے گانڈے کی ہمہ جہت ترقی ہوگی۔
1977 سے اب تک جتنے بھی انتخابات ہوئے ہیں ان میں مسلمانوں اور قبائلیوں نے جیت یا ہار میں اہم کردار ادا کیا ہے۔ جس دن جے ایم ایم نے گانڈے سے کلپنا سورین کی امیدواری کا اعلان کیا، کلپنا سورین کی جیت تقریباً یقینی سمجھی جا رہی تھی۔ لوگوں کا خیال ہے کہ کلپنا سورین کی پہلی میعاد صرف پانچ چھ ماہ کی ہوگی لیکن لوگوں کو ان سے کافی توقعات وابستہ ہیں۔قابل ذکر ہے کہ زمین گھوٹالے میں ہیمنت سورین کے خلاف ای ڈی کی کارروائی شروع ہونے کے بعد، اس سال جنوری کے پہلے ہفتے میں، جے ایم ایم نے پارٹی کے ایم ایل اے ڈاکٹر سرفراز احمد سے گانڈے سیٹ خالی کرائی گئی تھی۔ بعد میں جے ایم ایم نے احمد کو راجیہ سبھا بھیجنے کا وعدہ بھی پورا کیا۔