تاثیر۱۴ جون ۲۰۲۴:- ایس -ایم- حسن
احمدآباد،14 جون:گجرات میں بی جے پی کی حکمرانی والی وڈودرا میونسپل کارپوریشن نے کرکٹر اورٹی ایم سی کے ایم پی یوسف پٹھان کی مشکلات میں اضافہ کر دیا ہے۔ یوسف کو مبینہ طور پر ایک اراضی پر تجاوزات کا نوٹس بھیجا گیا ہے جس کا میونسپل کارپوریشن نے دعویٰ کیا ہے۔پٹھان کو نوٹس 6 جون کو بھیجا گیا تھا، لیکن وی ایم سی کی اسٹینڈنگ کمیٹی کے چیئرمین شیتل مستری نے جمعرات کو میڈیا کو بریفنگ دی جب بی جے پی کے سابق کونسلر وجے پوار نے یہ مسئلہ اٹھایا۔ آپ کو بتاتے چلیں کہ سابق آل راؤنڈر پٹھان نے ٹی ایم سی کے ٹکٹ پر بہرام پور حلقہ سے لوک سبھا الیکشن جیتا ہے۔وجے پوار نے الزام لگایا کہ ریاستی حکومت نے 2012 میں پٹھان کو زمین فروخت کرنے کے وی ایم سی کی تجویز کو مسترد کر دیا تھا، لیکن نو منتخب ایم پی نے کمپاؤنڈ دیوار بنا کر زمین پر قبضہ کر لیا تھا۔پوار نے صحافیوں کو بتایا کہ مجھے یوسف پٹھان سے کوئی شکایت نہیں ہے۔ ٹی پی 22 کے تحت ٹنڈلجا علاقے میں ایک زمین وی ایم سی کی ملکیتی رہائشی زمین ہے۔ 2012 میں پٹھان نے وی ایم سی سے اس زمین کا مطالبہ کیا تھا کیونکہ ان کا مکان، جو اس وقت زیر تعمیر تھا، اس زمین سے ملحق تھا۔ انہوں نے تقریباً 57,000 روپے فی مربع میٹر کی پیشکش کی تھی۔ اس وقت وی ایم سی نے اس تجویز کو منظوری دے دی تھی اور اسے جنرل بورڈ میٹنگ میں پاس کیا گیا تھا۔ تاہم، ریاستی حکومت جو اس طرح کے معاملات میں حتمی اتھارٹی ہے، نے اسے منظور نہیں کیا۔