تاثیر۱۶ جولائی ۲۰۲۴:- ایس -ایم- حسن
نئی دہلی، 16 جولائی : سپریم کورٹ نے آج دہلی ایکسائز گھوٹالہ معاملے کے ملزم دہلی کے سابق نائب وزیر اعلی منیش سسودیا کی ضمانت کی درخواست پر سماعت کی۔ سپریم کورٹ نے اس سلسلے میں سی بی آئی اور انفورسمنٹ ڈائریکٹوریٹ (ای ڈی) کو نوٹس جاری کیا۔ جسٹس بی آر گوئی کی سربراہی والی بنچ نے کیس کی اگلی سماعت 29 جولائی کو کرنے کا حکم دیا۔
سسودیا نے دہلی ہائی کورٹ کے 21 مئی کو ضمانت دینے سے انکار کرنے کے حکم کو چیلنج کیا ہے۔ دہلی ہائی کورٹ نے کہا تھا کہ سسودیا نے اپنے عہدے کا غلط استعمال کیا۔ گھوٹالے کے الیکٹرانک ثبوت کو بھی تباہ کر دیا۔ باہر آکر ثبوتوں اور گواہوں کو متاثر کر سکتے ہیں۔
ہائی کورٹ میں ای ڈی کی طرف سے پیش ہوئے ایڈوکیٹ زوہیب حسین نے کہا تھا کہ ملزمین کی وجہ سے اس کیس کی سماعت میں تاخیر ہو رہی ہے۔ ایک ملزم نے ٹرائل کورٹ میں درخواست دائر کرتے ہوئے کہا ہے کہ چارج شیٹ کے 1700 صفحات میں سے انہوں نے 1600 صفحات کی جانچ نہیں کی۔ وہ ملزم عام آدمی پارٹی کے ترجمان ہیں۔ ٹرائل کورٹ نے ایک ملزم کی جانب سے گھر کے کھانے کے مطالبے کی بھی سماعت کی۔
منیش سسودیا کی جانب سے ضمانت کا مطالبہ کرتے ہوئے یہ دلیل دی گئی تھی کہ اب بھی اس معاملے میں ای ڈی اور سی بی آئی کی جانچ جاری ہے۔ سسودیا کی طرف سے پیش ہوئے سینئر وکیل داین کرشنن نے کہا تھا کہ اس معاملے میں ابھی بھی گرفتاریاں جاری ہیں۔ سماعت کے دوران داین کرشنن نے سپریم کورٹ کے فیصلے کا حوالہ دیا تھا اور کہا تھا کہ سی بی آئی نے اس معاملے میں ایک اہم چارج شیٹ اور دو ضمنی چارج شیٹ داخل کی ہیں۔
ای ڈی نے ایک اہم چارج شیٹ اور چھ سپلیمنٹری چارج شیٹ داخل کی ہیں۔ دونوں کیسز کی تفتیش ابھی جاری ہے۔ اس معاملے میں گرفتاری ابھی بھی جاری ہے۔ تازہ ترین گرفتاری 3 مئی کو کی گئی تھی۔ انہوں نے کہا تھا کہ ایک ملزم کے خلاف تو اب بھی الزامات طے نہیں کیے گئے۔ سسودیا کی ضمانت عرضی کی سماعت کے دوران ٹرائل کورٹ نے اس پہلو پر غور نہیں کیا۔ انہوں نے کہا کہ ٹرائل شروع کرنے کی طرف صفر کام کیا گیا ہے۔ ایسے میں سپریم کورٹ کے فیصلے کے مطابق منیش سسودیا کو ضمانت ملنی چاہیے۔