تاثیر۱۳ جولائی ۲۰۲۴:- ایس -ایم- حسن
ممبئی ، 13 جولائی : ممبئی اور پونے شہر کے آس پاس کے علاقوں میں ہفتہ کی صبح سے بارش کی وجہ سے زندگی متاثر ہوئی ہے۔مسلسل موسلادھار بارش نے ممبئی کی لائف لائن لوکل ٹرینوں کو متاثر کیا ہے۔ جس کی وجہ سے ہاربر لوکل ریلوے تاخیر سے چل رہی ہے۔ اس کا خمیازہ ممبئی والوں کو اٹھانا پڑ رہا ہے۔ محکمہ موسمیات نے اتوار کو ممبئی اور آس پاس کے علاقوں میں شدید بارش کی وارننگ دی ہے۔ ممبئی کے کئی علاقوں میں آج صبح سے ہی بارش شروع ہوگئی۔ اس کی وجہ سے نوی ممبئی، تھانے، کلیان، دادر، بھیونڈی سمیت کئی علاقوں میں پانی بھر گیا ہے۔ موسلادھار بارش کی وجہ سے اندھیری، میلان اور ملاڈ سب ویز پانی میں ڈوب گئے ہیں۔ ان تینوں سب ویز کو ٹریفک کے لیے بند کر دیا گیا ہے جس کی وجہ سے مسافروں کو پریشانی کا سامنا ہے۔ بارش کے باعث کنگ سرکل کا علاقہ زیر آب آ گیا ہے۔ بارش کی وجہ سے دادر سے چیمبور تک کئی گھروں میں پانی داخل ہونے کی اطلاعات ہیں۔ پونے کے کچھ علاقوں میں آج صبح سے ہلکی بارش ہو رہی ہے۔ محکمہ موسمیات کا اندازہ ہے کہ پونے میں 14 جولائی تک ہلکی سے درمیانی بارش ہوگی۔