تاثیر ۲ اگست ۲۰۲۴:- ایس -ایم- حسن
گرڈیہ، 2 اگست: ضلع کے سریا تھانہ علاقہ کی پرسیا پنچایت کے کمہار ٹولہ میں تالاب نما گڑھے میں ڈوبنے سے ایک ہی خاندان کے دو بچوں کی موت ہو گئی۔ دونوں بچے آپس میں چچازاد بھائی تھے۔
معلومات کے مطابق، چھوٹے پنڈت کا آٹھ سالہ بیٹا آیوش کمار اور مکیش کمار پنڈت کا چھ سالہ بیٹا ساجن کمار جمعرات کی دیر شام گھر سے کچھ فاصلے پر کھیل رہے تھے۔ کھیلتے ہوئے دونوں بچے تالاب جیسے گڑھے میں ڈوب گئے۔ واقعہ کی اطلاع ملتے ہی گھر والے دونوں بچوں کو فوری طور پر گڑھے سے نکال کر بگودر کے سی ایچ سی کمیونٹی ہیلتھ سنٹر لے گئے جہاں رات دیر گئے ڈاکٹروں نے دونوں بچوں کو مردہ قرار دے دیا۔ جمعہ کی صبح سے ہی مختلف تنظیموں کے لوگ متاثرہ کے گھر والوں کو تسلی دینے کے لیے ان کے گھر جا رہے ہیں۔