تاثیر ۱۰ اگست ۲۰۲۴:- ایس -ایم- حسن
سری گنگا نگر، 10 اگست:بارڈر سیکیورٹی فورس (بی ایس ایف) کو راجستھان کے انوپ گڑھ ضلع میں ہندوستان-پاکستان سرحد پر وجیت پوسٹ پر ایک ڈرون ملا ہے۔ اس کے ساتھ تین کلو ہیروئن برآمد ہوئی ہے۔ بین الاقوامی مارکیٹ میں اس کی قیمت تقریباً 15 کروڑ روپے بتائی گئی ہے۔ ڈرون ملنے کے بعد بی ایس ایف نے پولیس کے ساتھ مل کر پورے علاقے میں تلاشی مہم شروع کر دی ہے، بی ایس ایف حکام نے بتایا کہ یہ ڈرون انوپ گڑھ کے 30 اے پی ڈی کے قریب کالورام نائک کے کھیت میں ملا ہے۔ کسان نے ہفتہ کی صبح 4.15 بجے کھیت میں ڈرون دیکھ کر اطلاع دی تھی۔ جس کے بعد ٹیم موقع پر پہنچی اور کھیت سے پاکستانی ڈرون کے ساتھ پیلے رنگ کے پیکٹ میں بند تین کلو ہیروئن برآمد کر لی۔ ڈرون کو پاکستان سے ہیروئن کی کھیپ بھارت میں اسمگل کرنے کے لیے بھیجا گیا تھا لیکن تکنیکی خرابی یا بیٹری ڈسچارج ہونے کے باعث ڈرون سرحد کے قریب ایک کھیت میں گرا۔ جس کی وجہ سے اسمگلنگ کا منصوبہ ناکام ہو گیا۔ بی ایس ایف کو پہلے ہی اطلاعات موصول ہوئی تھیں کہ پاکستان ڈرون کے ذریعے ہیروئن بھیجنے کا منصوبہ بنا رہا ہے۔ اطلاع ملنے کے بعد، بی ایس ایف نے مستعدی سے کام کیا اور انوپ گڑھ ضلع کی بین الاقوامی سرحد کو مختلف مقامات پر بلاک کر دیا، تاکہ ہیروئن کی کھیپ کو اسمگلروں تک پہنچنے سے روکا جا سکے۔ انوپ گڑھ تھانے کے ایس ایچ او انیل کمار نے بتایا کہ گاؤں 30 اے پی ڈی کے رہنے والے کالورام نائک جب اپنے کھیت میں گئے تو انہوں نے ایک ڈرون دیکھا۔ کسان نے اس کی اطلاع بی ایس ایف کے جوانوں کو دی۔ جب بی ایس ایف کے اہلکار موقع پر پہنچے تو ڈرون کے ساتھ پیلے رنگ کے پیکٹ میں ہیروئن برآمد ہوئی۔ بی ایس ایف کے اہلکاروں نے اس کی اطلاع انوپ گڑھ پولیس کو دی۔ انہوں نے کہا کہ مقدمہ درج کر کے مزید کارروائی شروع کر دی ہے۔