ارریہ میں ضلع سطح کا سالانہ اسکول اسپورٹس مقابلے جاری۔

ارریہ :-  ( مشتاق احمد صدیقی ) ارریہ میں ضلع سطح کے اسکولی کھیلوں کے مقابلے کا بدھ 4 ستمبر کو نیتا جی سبھاش اسٹیڈیم میں رنگا رنگ افتتاح کیا گیا۔  اس تقریب کا افتتاح ضلع مجسٹریٹ مسز عنایت خان، ایڈیشنل کلکٹر (ڈیزاسٹر) مسٹر جنمےجے شکلا، ضلع انفارمیشن پبلک ریلیشن آفیسر مسز سونی کماری، ضلع تعلیمی افسر، سینئر ڈپٹی کلکٹر مسٹر اروند کمار، اسسٹنٹ ڈائرکٹر سوشل سیکورٹی نتیش پاٹھک، ڈسٹرکٹ پلاننگ آفیسر کم ڈسٹرکٹ اسپورٹس آفیسر محمد عاکف وقاص، ڈسٹرکٹ فشریز آفیسر اور کئی دیگر انتظامی افسران نے شمع روشن کرکے اور غباروں کا گچھا اڑا کرکیا۔ اس کے بعد ڈی ایم سمیت دیگر عہدیداروں نے 100 میٹر لڑکیوں اور لڑکوں کے زمرے کو جھنڈی دکھا کر روانہ کیا۔ اس موقع پر ڈپٹی سپرنٹنڈنٹ فزیکل ایجوکیشن، ڈسٹرکٹ اسپورٹس آفیسر محمد عاکف وقاص نے اپنے خطاب میں کہا کہ ضلع سطح کے ایونٹ کے جیتنے والے کھلاڑی ریاستی سطح پر کھیلیں گے۔  ضلع میں کھیلوں کو فروغ دینے کے لئے ہر بلاک میں ایک اسٹیڈیم اور ہر پنچایت میں ایک اسپورٹس کلب بنایا جانا ہے۔  پہلی بار ارریہ ضلع ریاستی سطح کے ووشو کھیلوں کے مقابلے کی میزبانی بھی کرے گا۔  گزشتہ ہفتے یومِ قومی کھیل کے موقع پر وزیر اعلیٰ نتیش کمار نے راجگیر میں آسٹرو ٹرف ہاکی اسٹیڈیم اور اسپورٹس کمپلیکس کا افتتاح کیاتھا۔  ارریہ ضلع کے بچے بھی اس سے مستفید ہوں گے۔  حکومت اور ضلع انتظامیہ کھیلوں کے فروغ کے لیے مسلسل کوششیں کر رہی ہے۔  اسی کا نتیجہ ہے کہ پہلے روز 1200 سے زائد لڑکوں اور لڑکیوں نے مختلف کھیلوں کے مقابلوں میں حصہ لیا۔ پہلے دن ایتھلیٹکس کے کئی مقابلوں کے ساتھ ساتھ 100 میٹر، 200 میٹر، 400 میٹر، شاٹ پٹ، جیولین تھرو، لانگ جمپ، ہائی جمپ، کبڈی کا بھی انعقاد کیا گیا۔  تمام ایونٹس انڈر 14، انڈر 17 اور انڈر 19 بوائز اور گرلز کیٹیگری کے گروپس کے تحت منعقد کیے گئے تھے۔  جیتنے والے کھلاڑیوں کو ڈسٹرکٹ اسپورٹس آفیسر نے شام کو میڈل دے کر اعزاز سے نوازا۔  یہ کھیلوں کے مقابلے 6 ستمبر تک جاری رہیں گے۔  اس موقع پر ایک درجن سے زائد اسپورٹس اساتذہ متحرک تھے۔ اس موقع پر تمام شرکاء مقابلہ اور شائقین کھیل کود کوخطاب کرتی ہوئی محترمہ عنایت خان ضلع مجسٹریٹ ارریہ نے کہا کہ ہم ضلع کے تمام شرکاء کا خیر مقدم کر رہے ہیں۔  04 سے 06 ستمبر تک جاری رہنے والے اس مقابلے میں ضلع کے مختلف اسکولوں کے 1260 بچے پورے جوش و خروش سے حصہ لے رہے ہیں۔ آپ نے مزید کہا کہ ریاستی حکومت کھیلوں کے فروغ پر خصوصی توجہ دے رہی ہے۔  ضلع کی تمام پنچایتوں میں اسپورٹس کلب بنائے جا رہے ہیں اور کھیلوں کے میدان تیار کیے جا رہے ہیں، تاکہ کھلاڑیوں کو مناسب رہنمائی اور تربیت مل سکے۔  انہوں نے کہا کہ اس کا مقصد کھلاڑیوں کی صلاحیتوں کو نکھارنا ہے، تاکہ وہ قومی اور بین الاقوامی سطح پر تمغے جیت سکیں۔  راجگیر میں اسپورٹس کمپلیکس اور بہار اسپورٹس یونیورسٹی پر ضلع مجسٹریٹ نے تبادلہ خیال کیا۔  ڈسٹرکٹ مجسٹریٹ نے کہا کہ اس طرح کے ایونٹس سے کھلاڑیوں کے حوصلے بلند ہوتے ہیں اور انہیں ایک دوسرے سے سیکھنے کا موقع بھی ملتا ہے۔  ضلع میں اسپورٹس کلچر کی ترقی پر زور دیتے ہوئے ضلع مجسٹریٹ نے کہا کہ آنے والے دنوں میں اس سمت میں اور بھی بہتر کوششیں کی جائیں گی۔  انہوں نے کھلاڑیوں سے اپیل کی کہ وہ اپنے اندر خود اعتمادی پیدا کریں ! اور ریاست اور ملک کے لیے بہترین کارکردگی کا مظاہرہ کریں۔  انہوں نے شرکاء کی حوصلہ افزائی بھی کی اور کہا کہ مقابلے میں حصہ لینا ضروری ہے، چاہے نتیجہ کچھ بھی ہو۔ مقابلے کے پہلے دن تمام اعلیٰ افسران، مختلف اسکولوں کے اسپورٹس ٹیچر، شرکائے مقابلہ اور شائقین کھیل کی بڑی تعداد موجود تھی۔