تاثیر ۲۳ ستمبر ۲۰۲۴:- ایس -ایم- حسن
دربھنگہ(فضا امام) 23 ستمبر:- دربھنگہ میں شوبھن ایکمی بائی پاس روڈ پر واقع بلیا موجے کے قریب آل انڈیا انسٹی ٹیوٹ آف میڈیکل سائنسز (AIIMS) کی تعمیر کے لیے مجوزہ جگہ پر زمین کے سروے کا کام شروع ہو گیا ہے۔ زمین کے سروے کا کام مرکزی وزیر صحت جے پی نڈا، بہار حکومت کے وزیر صحت منگل پانڈے اور ایمس کے ایگزیکٹیو ڈائریکٹر ڈاکٹر مادھاوانند کر کے 7 ستمبر کو سائٹ کے معائنہ کے 15 دن بعد شروع ہوا ہے۔ڈی ایس آر سروے پرائیویٹ لمیٹڈ کمپنی کی جانب سے کولکاتا اور دہلی کی پانچ رکنی ٹیم نے تعمیراتی مقام پر زمین کا سروے شروع کر دیا ہے۔ ہسپتال کے حوالے سے اراضی سروے کا کام شروع ہونے سے علاقہ متھلا کے عوام میں اعتماد بیدار ہوا ہے۔سروے ٹیم میں شامل جئے منڈل، شیوم کمار، آنند کمار، سنجے منڈل، سمودیپ سومانتا نے بتایا کہ وزارت صحت اور خاندانی بہبود، دہلی کی ہدایت پر دو سو ایکڑ اراضی کا سروے کرنے کی تجویز دی گئی ہے۔ شوبھن بائی پاس میں ایمس کی تعمیر تکنیکی آلات کے ذریعے کی جا رہی ہے اس کے بعد رپورٹ پیش کی جائے گی۔ اس کے بعد سرکاری معیار کے مطابق زمینی کام کا عمل شروع ہو جائے گا۔ سروے کرنے والی ٹیم کے تین ارکان مجوزہ اراضی کی آبی گزرگاہ پر تین سے چار فٹ پانی کے اندرونی حصے کے سروے کے کام کے لیے تعینات ہیں۔