تاثیر 20 اکتوبر ۲۰۲۴:- ایس -ایم- حسن
نئی دہلی، 21 اکتوبر: دہلی کی ‘آپ’ حکومت بڑھتی ہوئی آلودگی کے خلاف جنگی بنیادوں پر کام کر رہی ہے۔ اسی سلسلے میں، دہلی کے ماحولیات کے وزیر گوپال رائے نے پیر کو “ریڈ لائٹ آن – گاڑی آف” مہم شروع کی ہے۔ آئی ٹی او چوراہے سے مہم کا آغاز کرتے ہوئے وزیر ماحولیات نے ڈرائیوروں کو سرخ بتی پر ٹریفک روکنے کو کہا۔گاڑیوں کے انجن کو بند کرکے آلودگی کم کرنے میں کردار ادا کرنے کی اپیل کی۔ اس دوران گوپال رائے نے کہا کہ دہلی میں اس وقت بڑھتی ہوئی آلودگی کی سب سے بڑی وجہ بائیو ماس کے جلنے اور دھول سے ہونے والی آلودگی کے ساتھ ساتھ گاڑیوں سے ہونے والی آلودگی ہے۔ اسی کو مدنظر رکھتے ہوئے ریڈ لائٹ آن گاڑی آف مہم شروع کی گئی ہے۔ دہلی کے باہر سے آنے والی آلودگی کا خمیازہ دہلی والوں کو اٹھانا پڑتا ہے۔ پنجاب حکومت کی کوششوں سے پرالی جلانے کے واقعات میں کمی آئی ہے، وہیں ہریانہ اور اتر پردیش کی حکومتیں اس سمت میں کوئی قدم نہیں اٹھا رہی ہیں اور وہاں پر پرالی جلانے کے واقعات مسلسل ہو رہے ہیں۔ وزیر ماحولیات گوپال رائے نے کہا کہ گزشتہ برسوں میں دہلی کے لوگوں اور متعلقہ محکموں کی محنت سے آلودگی کی سطح میں تقریباً 34.6 فیصد کمی آئی ہے۔ اس بار پھر دہلی آلودگی کے خلاف اس جنگ میں تیار ہے۔ وزیر ماحولیات گوپال رائے نے کہا کہ دہلی حکومت نے آلودگی کے خلاف گرین وار روم شروع کیا ہے۔دھول کی آلودگی پر قابو پانے کے لیے اینٹی ڈسٹ مہم چلائی گئی ہے اور 5 ہزار ایکڑ رقبے پر پرالی پگھلانے کے لیے بائیو ڈی کمپوزر کا اسپرے کیا جا رہا ہے۔ اسی سلسلے میں اب ‘ریڈ لائٹ آن گاڑی آف’ مہم شروع کی جا رہی ہے۔گوپال رائے نے کہا کہ دہلی کے لوگوں کو دہلی کے اندر کی آلودگی کے ساتھ ساتھ دہلی کے باہر سے آنے والی آلودگی کا بھی سامنا کرنا پڑتا ہے، جو دہلی کی آلودگی سے دوگنا ہے۔