تاثیر 06 مارچ ۲۰۲۵:- ایس -ایم- حسن
ممبئی6 مارچ(ایم ملک)ریما کاگتی کی فلم سپر بوائز آف مالیگاؤں واقعی ایک دل کو چھو لینے والی کہانی ہے جو پوری دنیا کے ناظرین کے دل جیت رہی ہے ۔ کئی بین الاقوامی فلمی میلوں میں دھوم مچانے اور ناقدین کی جانب سے زبردست پذیرائی حاصل کرنے کے بعد اب اس فلم کو سینما گھروں میں بھی شائقین کی جانب سے پذیرائی مل رہی ہے ۔ اب، مالیگاؤں کے سپر بوائز نے ایک اور عظیم کارنامہ انجام دیا ہے – اس نے آسٹریلیا کے نیشنل انڈین فلم فیسٹیول میں ‘بہترین فلم’ کا ایوارڈ جیتا ہے ۔ڈائریکٹر ریما کاگتی نے اس بڑی جیت پر خوشی کا اظہار کرتے ہوئے کہا، “میں آسٹریلیا کے نیشنل انڈین فلم فیسٹیول کا شکریہ ادا کرنا چاہوں گی کہ انہوں نے سپر بوائز آف مالیگاؤں کو بہترین فلم کے طور پر منتخب کیا اور اسے آسٹریلیا کے مختلف شہروں میں نمائش کے لیے پیش کیا، جس سے فلم کو زیادہ سے زیادہ ناظرین تک پہنچنے کا موقع ملا۔ ہمیں خوشی ہے کہ فیسٹیول کے شائقین خوابوں اور جدوجہد کی اس کہانی سے جڑے ہوئے ہیں۔”آسٹریلیا کے نیشنل انڈین فلم فیسٹیول کا پہلا ایڈیشن 13 فروری سے 2 مارچ 2025 تک منعقد ہوا، جو آسٹریلیا میں ہندوستانی سنیما کے جشن میں ایک سنگ میل ثابت ہوا۔ یہ میلہ سات شہروں سڈنی، کینبرا، گولڈ کوسٹ، برسبین، پرتھ، ایڈیلیڈ اور میلبورن میں منعقد کیا گیا جہاں سامعین کو بھارتی فلموں کی ایک بڑی قسم دیکھنے کو ملی۔ میلے کا اختتام ایک عظیم الشان ریڈ کارپٹ گالا اور مرڈوک یونیورسٹی، پرتھ میں تنیشتھا چٹرجی کے روم روم میں کی اسکریننگ کے ساتھ ہوا۔ اور سینما کے شائقین کے لیے اس فلمی سفر کو آگے لے جانے کے لیے ، ڈینڈی سینماز آنے والے ہفتوں میں چنیدہ فیسٹیول فلموں کی انکور اسکریننگ کا اہتمام کریں گے ، اس طرح اس سینما کے جشن کو زندہ رکھا جائے گا۔