مدھیہ پردیش میں سورج کی تپش سے درجہ حرارت میں اضافہ، اندور-اجین سب سے زیادہ گرم

تاثیر 12  مارچ ۲۰۲۵:- ایس -ایم- حسن

بھوپال، 12 مارچ:مارچ کے مہینے میں گرمی نے اپنے اثرات دکھانا شروع کر دیے ہیں۔ مدھیہ پردیش میں مسلسل گرم ہواوں کی وجہ سے بیشتر اضلاع میں گرمی شدید ہونے لگی ہے۔ ریاست میں زیادہ سے زیادہ درجہ حرارت 39 ڈگری سیلسیس تک پہنچ گیا ہے۔ منگل کو ریاست کے کئی شہروں میں گرمی کا اثر دیکھا گیا۔ بھوپال، اندور اور اجین ڈویڑن سب سے زیادہ گرم رہے۔ وہیں نرمداپورم-جبل پور ڈویڑن میں بھی درجہ حرارت میں اضافہ ہوا۔ موسم کا یہ مزاج دو سے تین دن تک جاری رہ سکتا ہے۔
محکمہ موسمیات کے مطابق اندور ڈویڑن کا دھار شہر منگل کو سب سے زیادہ گرم رہا۔ یہاں دن کا درجہ حرارت 39.1 ڈگری سیلسیس رہا۔ جبکہ نرمداپورم میں درجہ حرارت 39 ڈگری ریکارڈ کیا گیا۔ اسی طرح رتلام میں پارہ 38.5 ڈگری، کھجوراہو میں 38.4 ڈگری، گنا میں 38.1 ڈگری، دموہ میں 37.5 ڈگری، منڈلا، شیو پوری-سیونی میں 37.2 ڈگری اور ساگر میں 37.1 ڈگری ریکارڈ کیا گیا۔ تاہم رات کے وقت پارے میں اتار چڑھاو دیکھا جا رہا ہے۔ گوالیار-اجین بڑے شہروں میں سب سے زیادہ گرم ہے۔ یہاں درجہ حرارت 37.5 ڈگری ریکارڈ کیا گیا۔ اندور میں 37.3 ڈگری اور بھوپال میں 37.1 ڈگری رہا۔ جبل پور میں یہ 35.2 ڈگری سیلسیس تھا۔