تاثیر 25 جولائی ۲۰۲۵:- ایس -ایم- حسن
کولکتہ، 25 جولائی 2025
کولکتہ, 25/ جولائی (محمد عمران، چاپدانی) کولکتہ شہر میں صرف ایک دن کی موسلا دھار بارش نے انتظامیہ کی تیاریوں کی قلعی کھول دی ہے۔ شہر کے کئی علاقوں میں سڑکیں ندی نالوں کا منظر پیش کرنے لگیں، ٹریفک نظام درہم برہم ہو گیا، اور کئی محلوں میں پانی گھروں میں گھس آیا۔
سب سے زیادہ متاثرہ علاقے میں بہالہ، ٹالی گنج، کسیا بگان، توپسیا، مشرقی اور شمالی کولکتہ کے حصے شامل ہیں۔ جبکہ ہوڑہ کے ٹکیہ پاڑہ، پیل خانہ، بیلگچھیا، قدم تلہ و دیگر علاقے زیرِ آب ہیں۔ لوگ دفاتر اور اسکولوں تک نہ پہنچ سکے، اور کئی علاقوں میں بجلی کی فراہمی بھی متاثر رہی۔
مقامی لوگوں نے شکایت کی کہ نالیوں کی صفائی نہ ہونے اور ناقص ڈرینج سسٹم کے باعث معمولی بارش بھی عذاب بن جاتی ہے۔ ایک مقامی شہری کا کہنا تھا کہ
“یہ ہر سال کا مسئلہ ہے، لیکن حکومت محض وعدے کرتی ہے، عملی قدم نہیں اٹھاتی۔”
ماہرین کے مطابق، اگر شہری بنیادی ڈھانچے کو جدید نہ بنایا گیا تو مستقبل میں بارشیں شہر کو مزید مفلوج کرتی رہیں گی۔
حکام کی جانب سے دعویٰ کیا گیا ہے کہ نکاسی آب کے کام تیزی سے جاری ہیں، مگر زمینی حالات اس کے برعکس نظر آتے ہیں۔ یہ صورتحال ایک بار پھر یاد دلاتی ہے کہ موسمیاتی تبدیلی کے دور میں شہری منصوبہ بندی کو سنجیدگی سے لینا ناگزیر ہو چکا ہے۔