تاثیر 18 جولائی ۲۰۲۵:- ایس -ایم- حسن
پٹنہ، 18 جولائی:محکمہ موسمیات نے آئندہ 24 گھنٹوں میں بہار کے مغربی چمپارن، گوپال گنج اور سیوان میں شدید بارش کی وارننگ جاری کی ہے۔ اس کے علاوہ شمال وسط بہار میں 30-40 کلومیٹر فی گھنٹہ کی رفتار سے تیز ہوائیں چلنے اور ا?سمانی بجلی گرنے کا بھی امکان ہے۔ جمعرات کے روز بہار کے بھبھوا کے بھگوان پور میں سب سے زیادہ 160.4 ملی میٹر بارش درج کی گئی۔
موسمیاتی مرکز پٹنہ کے مطابق، جنوب مشرقی اتر پردیش اور جنوب مغربی بہار کے ارد گرد بننے والا کم دباؤ کا علاقہ شمال مغربی سمت میں بڑھ رہا ہے۔ اس کے اثر سے بہار میں 20 جولائی سے بارش کا نظام زیادہ فعال ہو جائے گا، جس کی وجہ سے 20 سے 23 جولائی تک اچھی بارش ہونے کا امکان ہے۔ گزشتہ 24 گھنٹوں میں ویشالی، روہتاس، اورنگ آباد اور مدھوبنی جیسے اضلاع میں بھی اچھی بارش ہوئی، جس سے درجہ حرارت کو کچھ حد تک کنٹرول کیا گیا۔