بہارکا ترقیاتی سفر جاری

بہار کی سیاست اس وقت ایک نازک موڑ سے گزر رہی ہے، جہاں الیکشن کمیشن کے اسپیشل انٹینسیو ریویژن (ایس آئی آر) پروگرام نے قومی سطح پر تنازع کھڑا کر دیا ہے۔ اپوزیشن کی جانب سے ووٹر لسٹوں میں مبینہ بے ضابطگیوں کے الزامات کے باوجود، وزیر اعلیٰ نتیش کمار کی قیادت میں بہار کی کابینہ ترقیاتی ایجنڈے کو مضبوطی سے آگے بڑھانے میں مصروف ہے۔ کل منگل کی صبح منعقدہ کابینہ اجلاس میں 16 اہم تجاویز کو منظوری دی گئی، جو نہ صرف ریاست کی معاشی ترقی کی عکاسی کرتی ہیں بلکہ نتیش کمار کی عوام دوست پالیسیوں کی مضبوطی کو بھی ظاہر کرتی ہیں۔ یہ فیصلے، جو انفراسٹرکچر، سیاحت، زراعت اور سماجی بہبود سے متعلق ہیں، بہار کو ترقی کی نئی بلندیوں تک لے جانے کا عزم رکھتے ہیں۔

کابینہ نے ریاست میںبنیادی ڈھانچے کی ترقی کو اولین ترجیح دی ہے۔ سالی پور-نرسڈا-تیلمر-کروٹا روڈ (این ایچ-30) کو دو لین سے چار لین میں اپ گریڈ کرنے کے منصوبے کو 539.19 کروڑ روپے کی لاگت سے منظوری دی گئی ہے۔ اسی طرح، راجگیر اسپورٹس کمپلیکس سے انٹرنیشنل کرکٹ سٹیڈیم تک 7.4 کلومیٹر لمبی چار لین سڑک کی تعمیر کے لیے 363.99 کروڑ روپے مختص کیے گئے ہیں۔ یہ منصوبے نہ صرف ٹریفک کی روانی کو بہتر بنائیں گے بلکہ دیہی اور شہری علاقوں کے درمیان رابطوں کو مضبوط کریں گے۔ راجگیر میں انٹرنیشنل کرکٹ سٹیڈیم کا منصوبہ بہار کو کھیلوں کے عالمی نقشے پر نمایاں کرے گا، جو نوجوانوں کے لئے مواقع اور ریاست کی شہرت کو بڑھاوا دے گا۔ یہ فیصلے نتیش کمار کی دور اندیش قیادت کی مثال ہیں، جو بہار کو جدید خطوط پر استوار کرنے کی کوشش کر رہی ہے۔

سیاحت کے شعبے میں، راجگیر میں دو فائیو سٹار ہوٹلوں اور ویشالی میں ایک فائیو سٹار ریزورٹ کی تعمیر کی منظوری ایک گیم چینجر ثابت ہو سکتی ہے۔ بہار، جو بدھ مت کے تاریخی ورثے اور روحانی مقامات کے لئے مشہور ہے، اس طرح کے منصوبوں سے عالمی سیاحوں کی توجہ حاصل کر سکتا ہے۔ یہ ہوٹلز نہ صرف سیاحت کو فروغ دیں گے بلکہ مقامی سطح پر ہزاروں روزگار کے مواقع بھی پیدا کریں گے۔ نتیش حکومت کی یہ حکمت عملی بہار کی معیشت کو متنوع بنانے اور اسے سیاحتی ہب کے طور پر قائم کرنے کی طرف ایک اہم قدم ہے۔

زراعت، جو بہار کی معیشت کی ریڑھ کی ہڈی ہے، کو بھی نظر انداز نہیں کیا گیا ہے۔ ’’ای-نام‘‘  اسکیم کے تحت 20 مارکیٹ یارڈز کی ترقی کے لئے 6 کروڑ روپے کی منظوری سے کسانوں کو اپنی پیداوار براہ راست مارکیٹ تک پہنچانے میں آسانی ہوگی۔ اسی طرح، گنے کی صنعت کے  لئے گنا ڈیولپمنٹ سروسز رولز، 2025 کی منظوری کسانوں کی آمدنی بڑھانے میں معاون ثابت ہوگی۔ یہ اقدامات دیہی معیشت کو مضبوط کرنے اور کسانوں کی خوشحالی کےلئے نتیش حکومت کے عزم کو ظاہر کرتے ہیں۔

سماجی بہبود کے شعبے میں، کابینہ نے کئی عوام دوست فیصلے کیے ہیں۔ سرکاری نوکریوں کے امتحانات میں درخواست فیس کی چھوٹ سے غریب اور پسماندہ طبقات کے طلباء کو فائدہ ہوگا۔ اساتذہ کے ایوارڈ کی رقم کو 15,000 سے بڑھا کر 30,000 روپے کرنے کا فیصلہ تعلیم کے شعبے میں معیار کو بہتر بنانے کی جانب ایک اہم قدم ہے۔ اس کے علاوہ، سرکاری ملازمین کے لیے پنشن فنڈ ود ڈرال، گارنٹی موچن فنڈ میں 1000 کروڑ روپے کی سرمایہ کاری اور’’ ای-لابھارتی پورٹل ‘‘کی مینٹیننس کے لیے 5.30 کروڑ روپے کی منظوری سے

انتظامی شفافیت اور کارکردگی کو فروغ ملے گا۔ مجاہد آزادی اپندر ناتھ ورما کی سالگرہ کو سرکاری تقریب کے طور پر منانے اور خواتین ہیلتھ ورکرز کے رولز میں ترمیم جیسے فیصلے سماجی انصاف اور تاریخی ورثے کے احترام کی عکاسی کرتے ہیں۔

ایس آئی آر تنازع کے باوجود، نتیش کمار کی قیادت میں بہار کی کابینہ نے ترقیاتی ایجنڈے پر توجہ مرکوز رکھی ہے۔ یہ فیصلے ظاہر کرتے ہیں کہ حکومت سیاسی تنازعات سے بالاتر ہو کر عوام کی بہتری کے لیے کام کر رہی ہے۔ اگرچہ اپوزیشن کی تنقید اپنی جگہ موجود ہے، لیکن ان منصوبوں کی کامیابی سے بہار کی معاشی اور سماجی ترقی کو نئی رفتار مل سکتی ہے۔ نتیش کمار کی قیادت میں بہار ایک ایسی ریاست بننے کی طرف گامزن ہے، جو ترقی، خوشحالی اور شمولیت کی علامت ہو۔ یہ فیصلے نہ صرف موجودہ چیلنجوں کا مقابلہ کرنے کی صلاحیت رکھتے ہیں بلکہ مستقبل کے لئے ایک مضبوط بنیاد بھی فراہم کرنےوالےہیں۔

**********