تاثیر 21 اگست ۲۰۲۵:- ایس -ایم- حسن
کولکاتہ، 21 اگست:وزیر اعظم نریندر مودی جمعہ کو بنگال آ رہے ہیں۔ اس دوران وہ کئی پروگراموں میں شرکت کریں گے جن میں جلسہ عام اور میٹرو پروجیکٹ کا افتتاح بھی شامل ہے۔ ایک بار پھر ریاستی بی جے پی کے سینئر لیڈر دلیپ گھوش کو وزیر اعظم کی میٹنگ میں مدعو نہیں کیا گیا ہے۔
جمعرات کو صحافیوں سے بات کرتے ہوئے دلیپ گھوش نے واضح کیا کہ انہیں کسی سرکاری پروگرام میں مدعو نہیں کیا گیا ہے۔ جب ان سے ان کی حاضری کے بارے میں پوچھا گیا تو انہوں نے سوال ٹال دیا اور کہا کہ میں جا سکتا ہوں یا نہیں جا سکتا۔ میں کہاں جاؤں گا اس کا فیصلہ پارٹی کرتی ہے، میں نہیں۔ پارٹی کا پروگرام ہے تو پارٹی فیصلہ کرے گی لیکن حکومتی پروگرام میں شرکت کے لیے دعوت ضروری ہے، مجھے دعوت نہیں دی گئی۔ انہوں نے یہ بھی کہا کہ اب وہ پارٹی کے ایک عام کارکن ہیں اور انہیں جو بھی ذمہ داری دی جاتی ہے اسے پورا کرتے ہیں۔غور طلب ہے کہ اس سے پہلے بھی دلیپ گھوش کو کئی بار سرکاری تقریبات میں مدعو نہیں کیا گیا ہے۔