تاثیر 22 اگست ۲۰۲۵:- ایس -ایم- حسن
چتردرگا، 22 اگست: انفورسمنٹ ڈائریکٹوریٹ (ای ڈی) کے اہلکاروں نے جمعہ کی صبح کرناٹک کے چتردرگا سے کانگریس ایم ایل اے کے سی ویریندر کے گھر پر چھاپہ مارا۔
ای ڈی کی ٹیم چتردرگا ضلع کے چلکیرے قصبے میں کے سی ویریندر اور ان کے بھائیوں کے سی ناگراجہ اور کے سی تھیپیسوامی کی رہائش گاہ سمیت چار گھروں کی تلاشی لے رہی ہے۔ ای ڈی کے 40 سے زیادہ اہلکاروں نے، جو پرائیویٹ گاڑیوں میں پہنچے، معائنہ کیا۔
یہ چھاپہ ماری گزشتہ معاملوں کے حوالے سے اہم ہے۔ 11 دسمبر 2016 کو جب انکم ٹیکس حکام نے ویریندر کے گھر پر چھاپہ مارا تو انہیں باتھ روم سے 5 کروڑ روپے نقد اور 30کلو سونا ملا تھا۔
حال ہی میں کے سی ویریند کی ملکیت والی رتنا گولڈ، رتنا ملٹی سورس، پپی ٹیکنالوجی، رتنا گیمنگ سلوشنز سمیت کئی کمپنیوں کے ذریعے گیمنگ ایپس پر غیر قانونی رقم کی منتقلی کے الزامات کے تناظر میں چھاپے مارے گئے ہیں۔