تاثیر 08 اگست ۲۰۲۵:- ایس -ایم- حسن
میلبورن، 8 اگست: آسٹریلیا کے سابق ہیڈ کوچ ٹم نیلسن کو آسٹریلیا انڈر 19 ٹیم کا نیا کوچ مقرر کر دیا گیا ہے۔ وہ ہندوستان کی انڈر 19 ٹیم کے خلاف ہوم سیریز سے اپنے نئے کردار کا آغاز کریں گے۔ اس سیریز کو آئندہ انڈر 19 ورلڈ کپ کی تیاریوں کے حوالے سے اہم سمجھا جا رہا ہے۔
کرکٹ آسٹریلیا نے ہندوستان کے خلاف سیریز کے لیے 15 رکنی آسٹریلیا انڈر 19 ٹیم کا اعلان کر دیا ہے۔ سیریز ستمبر سے برسبین اور میکے میں کھیلی جائے گی جس میں تین 50 اوورز کے میچز اور دو چار روزہ یوتھ ٹیسٹ میچز شامل ہیں۔
ون ڈے میچز 21، 24 اور 26 ستمبر کو برسبین کے ایان ہیلی اوول میں کھیلے جائیں گے جبکہ پہلا یوتھ ٹیسٹ 30 ستمبر سے برسبین اور دوسرا یوتھ ٹیسٹ 7 اکتوبر سے میکے میں کھیلا جائے گا۔
اولیور پیک کو اسکواڈ میں شامل نہیں کیا گیا ہے کیونکہ وہ اسی وقت آسٹریلیا اے ٹیم کے ساتھ ہندوستان کا دورہ کریں گے۔ پیک نے گزشتہ سال ہندوستان میں یوتھ ٹیسٹ میں سنچری بنائی تھی اور حال ہی میں سری لنکا اے کے خلاف آسٹریلیا اے کے لیے اپنے 92 رنوں کے ساتھ سلیکٹرز کی توجہ مبذول کرائی۔ اگرچہ وہ اب بھی اگلے سال ہونے والے انڈر 19 ورلڈ کپ کے لیے اہل ہیں، لیکن ان کے مصروف ڈومیسٹک سیزن اور بی بی ایل میں میلبورن رینیگیڈز کے ساتھ معاہدہ ان کے انتخاب کو غیر یقینی بنا دیتا ہے۔