تاثیر 26 اگست ۲۰۲۵:- ایس -ایم- حسن
مجرموں کو کسی صورت میں بخشا نہیں جائے گا : ڈاکٹر خالد انور
سیتامڑھی (مظفر عالم)
وسیم انور خان عرف پٹو خان ولد رضی احمد خان ساکن مہسول چوک وارڈ نمبر 23 کو 12 جولائی 2025 کو قتل کر دیا گیا تھا۔ پیر کو جے ڈی یو کے ایم ایل سی ڈاکٹر خالد انور نے ان کے گھر جا کر اہل خانہ سے ملاقات کی۔ اس دوران انہوں نے پٹو خان کے والد رضی احمد خان اور ان کے بھائی گڈو خان سے گفتگو کی اور انہیں تسلی دی۔ ڈاکٹر خالد انور نے ضلع انتظامیہ سے بات کی اور مجرموں کو جلد از جلد گرفتار کرنے کی یقین دہانی کرائی۔ انہوں نے کہا کہ مجرموں کو کسی صورت میں بخشا نہیں جائے گا اور انصاف کی فراہمی کو یقینی بنایا جائے گا۔ انہوں نے پٹو خان کے اہل خانہ کو انصاف کی یقین دہانی کراتے ہوئے کہا کہ وہ ہر ممکن مدد کے لیے تیار ہیں۔ ڈاکٹر خالد انور نے پٹو خان کے قتل کی مذمت کرتے ہوئے کہا کہ ایسے واقعات معاشرے کے لیے خطرہ ہیں۔ انہوں نے کہا کہ جرائم پیشہ عناصر کے خلاف سخت کارروائی کی جائے تاکہ معاشرے میں امن و امان برقرار رہے۔ اس موقع پر مدرسہ رحمانیہ مہسول کے سابق صدر محمد ارمان علی ، جے ڈی یو لیڈر ڈاکٹر اقراء علی خان، جے ڈی یو لیڈر محمد نصیب الحق، سابق میئر امیدوار توقیر انور عرف سکندر ، ڈاکٹر اریب علی، محمد دانش، محمد فہیم، محمد بشارت گلاب، محمد ارشد، افروز عالم،جے ڈی لیڈر شاداب احمد خان، سرپنچ محمد جاوید کے علاوہ دیگر لوگ موجود تھے۔