تاثیر 30 اگست ۲۰۲۵:- ایس -ایم- حسن
کولکاتا، 30 اگست : سات سال کے طویل انتظار کے بعد، مغربی بنگال اسکول سروس کمیشن (ڈبلیو بی ایس ایس سی) نے غیر تدریسی عہدوں کے لیے بڑے پیمانے پر بھرتی کا عمل شروع کرنے کا اعلان کیا ہے۔ کمیشن کی جانب سے جمعہ کو جاری کردہ نوٹیفکیشن میں بتایا گیا ہے کہ اس سال کل 8477 آسامیاں پْر کی جائیں گی۔ ان میں سے 2989 پوسٹیں گروپ ’سی‘ کے تحت لائبریرین اور کلرک کے لیے ہیں، جب کہ گروپ’ڈی‘ کے ملازمین کے لیے 5488 آسامیاں مختص کی گئی ہیں۔ بھرتی کا یہ عمل سرکاری اور حکومت کے زیر اہتمام چلنے والے ہائی اسکولوں اور ہائر سیکنڈری اسکولوں میں غیر تدریسی عملے کی کمی کو پورا کرنے کے لیے کیا جا رہا ہے۔
کمیشن نے واضح کیا ہے کہ تفصیلی نوٹیفکیشن 31 اگست 2025 کو جاری کیا جائے گا۔ اس کے بعد درخواست کا عمل 16 ستمبر سے شروع ہوگا جو 31 اکتوبر 2025 تک چلے گا۔ امیدواروں کو آن لائن موڈ کے ذریعے درخواست دینا ہوگی۔ اہلیت کے معیار کے مطابق لائبریرین کے عہدے کے لیے آرٹس، سائنس یا کامرس میں گریجویٹ ڈگری لازمی ہے جبکہ کلرک کے لیے سیکنڈری یا اس کے مساوی امتحان پاس کرنا ضروری ہے۔ ساتھ ہی، گروپ’ڈی‘ کی آسامیوں کے لیے درخواست دینے کے لیے، کسی تسلیم شدہ اسکول سے پاس کرنا ضروری ہے۔ تمام زمروں کے لیے زیادہ سے زیادہ عمر کی حد 40 سال مقرر کی گئی ہے۔