تاثیر 2 ستمبر ۲۰۲۵:- ایس -ایم- حسن
ممبئی،1 ستمبرہر سال گنیشوتسو کے موقع پر، بالی ووڈ کی خوبصورت اداکارہ ایشوریہ رائے بچن بپا کے درشن کے لیے ممبئی کے سب سے مشہور اور عظیم الشان پنڈال، گاؤڈ سرسوت برہمن (جی ایس بی) گنپتی پنڈال میں جاتی ہیں۔ اس سال بھی ایشوریہ نے اپنی روایت کی پیروی کرتے ہوئے یہاں اپنی موجودگی ظاہر کی۔ خاص بات یہ تھی کہ اس بار ان کے ساتھ ان کی بیٹی آرادھیہ بچن بھی موجود تھیں۔ اس ماں بیٹی کی جوڑی کو گنپتی بپا کے قدموں میں جھکتے اور ان کا آشیرواد لیتے ہوئے دیکھا گیا۔
ایشوریہ اور آرادھیہ کی ایک خوبصورت ویڈیو سوشل میڈیا پر تیزی سے وائرل ہو رہی ہے۔ اس میں دونوں عقیدت میں ڈوبے ہوئے بھگوان گنیش کی پوجا کرتے نظر آ رہے ہیں۔ ایشوریا جہاں ہمیشہ کی طرح روایتی لباس میں بہت خوبصورت لگ رہی تھیں وہیں آرادھیہ نے بھی روایتی انداز میں سب کا دل جیت لیا۔ دونوں نے انتہائی سادگی سے پوجا کی اور عقیدت کے ساتھ بپا کے آگے سرجھکایا۔ اس ماں بیٹی کی جوڑی نے پنڈال میں موجود عقیدت مندوں کی توجہ اپنی جانب مبذول کرائی۔ جیسے ہی ایشوریہ اور آرادھیہ پنڈال میں داخل ہوئیں لوگوں نے ان کا استقبال کیا۔ باہر کھڑے مداح بھی ان کی ایک جھلک دیکھنے کے لیے بے چین نظر آئے۔ ہجوم میں موجود بہت سے لوگ ان کے ساتھ سیلفی لینے اور تصاویر لینے کے لیے دوڑے۔